രഹസ്യലോകം

മത്സരപ്പരീക്ഷാര്‍ത്ഥികള്‍ ശ്രദ്ധിക്കുവാന്‍.....

2012-01-18T17:30:00.001+05:30

ഇത് മത്സരങ്ങളുടടെയും മത്സരപ്പരീക്ഷകളുടെയും കാലമാണ്. വിവിധ Entrance പരീക്ഷകള്‍, U G C, J R F, C A T, N E T, S E T, P S C പരീക്ഷകള്‍ എന്നിങ്ങനെ എത്രയെത്ര മത്സരപ്പരീക്ഷകളാണ് നമ്മുടെ വിദ്യാര്‍ത്ഥികള്‍ക്ക് നേരിടുവാനുള്ളത്. ഉദ്യോഗാര്‍ത്ഥികള്‍ക്ക് ഉദ്യോഗലബ്ധിക്കും ഉദ്യോഗസ്ഥര്‍ക്ക് പ്രമോഷനും മറ്റുമായി പലതരത്തിലുള്ള മത്സരപ്പരീക്ഷകളില്‍ പങ്കെടുക്കേണ്ടി വരുന്നുണ്ട്. ഈ അവസരത്തില്‍ ആത്മവിശ്വാസത്തോടെയുള്ള കഠിനപ്രയത്നത്തിനു മേമ്പൊടിയായി ജ്യോതിഷോപദേശവും കൂടി സ്വീകരിക്കുന്നത് നന്നായിരിക്കും.

ബുദ്ധിയുടെ മാറ്റുരക്കുന്നവയാണല്ലൊ മത്സരപ്പരീക്ഷകള്‍. അതുകൊണ്ട് മത്സരങ്ങളെയും മത്സരപ്പരീക്ഷകളെയും പറ്റി ചിന്തിക്കുമ്പോള്‍ ബുദ്ധി-പ്രതിഭാ സ്ഥാനമായ അഞ്ചാം ഭാവമാണ് പ്രധാനമായും പരിഗണിക്കേണ്ടത്.

അഞ്ചാം ഭാവാധിപന്‍
അഞ്ചാം ഭാവത്തില്‍ സ്ഥിതിചെയ്യുന്ന ഗ്രഹം
അഞ്ചിലേക്ക് നോക്കുന്ന ഗ്രഹം
അഞ്ചാം ഭാവാധിപനോട് യോഗം ചെയ്യുന്ന ഗ്രഹം
അഞ്ചാം ഭാവാധിപനെ നോക്കുന്ന ഗ്രഹം

ഇങ്ങനെ അഞ്ചു വിധത്തിലുള്ള ഗ്രഹങ്ങളുടെ ദശയിലോ അപഹാരങ്ങളിലോ ആണ് സാധാരണയായി മത്സരങ്ങളെയോ മത്സരപ്പരീക്ഷകളെയോ നേരിടേണ്ടി വരുന്നത്. അഞ്ചാം ഭാവാധിപന്‍ നില്ക്കുന്ന രാശി, ഭാവം ആ രാശ്യാധിപന്‍, ഭാവാധിപന്‍ എന്നിവ കൂടി ഇത്തരുണത്തില്‍ പരിചിന്തനത്തിന് വിധേയമാ ക്കേണ്ടതുണ്ട്.

പരീക്ഷക്കാലത്ത് മനസ്സും ശരീരവും ഒരുപോലെ ഏകാഗ്രവും ഊര്‍ജ്ജസ്വലവുമായിരിക്കണം. അതോടൊപ്പംതന്നെ ആത്മവിശ്വാസവും കഠിനപ്രയത്നവും കൂടിയുണ്ടെങ്കില്‍ വിജയിക്കുവാനുള്ള സാദ്ധ്യത വളരെക്കൂടുതലായിരിക്കും. വിജയം സുനിശ്ചിതമാക്കുന്ന ഇത്തരം കാര്യങ്ങളെ സ്വാധീനിക്കുന്ന ചില ഗ്രഹങ്ങളുണ്ട്.

**ഗ്രഹങ്ങളുടെ സ്വാധീനം**
മേഖല	സ്വാധീനിക്കുന്ന ഗ്രഹം
ശരീരം	സൂര്യന്‍
മനസ്സ്	ചന്ദ്രന്‍
ബുദ്ധി, പ്രതിഭ	വ്യാഴം
ആത്മവിശ്വാസം, ഊര്‍ജ്ജസ്വലത, മത്സരബുദ്ധി	ബുധന്‍
കഠിനപ്രയത്നം	കുജന്‍

ജാതകത്തിലും ഗോചരാലും സൂര്യചന്ദ്രന്മാര്‍ക്ക് ബലവും, ഗുരുവും ബുധനും തമ്മില്‍ നല്ല ബന്ധവും, അനുകൂലമായ കുജസ്ഥിതിയും ഉണ്ടായിരിക്കണം. എങ്കില്‍ മാത്രമേ വിജയം സുനിശ്ചിതമാവുകയുള്ളു. ഇങ്ങനെ അഞ്ചാം ഭാവവുമായി ബന്ധപ്പെട്ട ബലമുള്ള ഗ്രഹങ്ങളുടെ ദശാപഹാരഛിദ്രകാലങ്ങള്‍ ഗോചരാല്‍ അനുകൂലമായി വരുമ്പോഴാണ് മത്സരപ്പരീക്ഷകളില്‍ വിജയമുണ്ടാകുന്നത്.

എത്ര ബുദ്ധിമാനായാലും ജാതകത്തിലോ ഗോചരാലോ ഗ്രഹസ്ഥിതി അനുകൂലമല്ലെങ്കില്‍ പരീക്ഷകളില്‍ പ്രതീക്ഷിച്ച നേട്ടം കൈവരിക്കുവാന്‍ സാധിച്ചുവെന്നുവരില്ല. അതുകൊണ്ട് ഉത്സാഹിച്ചു പഠിക്കുന്നതോടൊപ്പം തന്നെ ഗ്രഹസ്ഥിതി വിശകലനം ചെയ്ത് ആവശ്യമായ പരിഹാരങ്ങളും കൂടി ചെയ്യുവാന്‍ പരീക്ഷാര്‍ത്ഥികളും അവരുടെ മാതാപിതാക്കളും ശ്രദ്ധിക്കണം.

കാലേക്കൂട്ടി പരിഹാരങ്ങള്‍ ചെയ്യുന്നതാണ് ഫലപ്രാപ്തിക്ക് അനുയോജ്യം.

വിവിധ Entrance Examinations ന് ഇനി ഏതാനും ദിവസങ്ങള്‍ കൂടി ബാക്കിയുണ്ട്. കിറുകൃത്യമായ Planning ഉം നിഷ്ഠയോടെയുള്ള പ്രവര്‍ത്തനവും കൂടിയായാല്‍ വിജയം സുനിശ്ചിതമാകും.

കൂടുതല്‍ വിശദമായി കാര്യങ്ങള്‍ ചര്‍ച്ചചെയ്യുന്നതിന് SSLC, +!, +2 വിദ്യാര്‍ത്ഥികളും അവരുടെ രക്ഷിതാക്കളും നേരിട്ടു വരുക.

astroraji : 9995361657
http://astroraji9995361657.blogspot.com

Read more: http://astroraji9995361657.blogspot.com/2011/12/blog-post_8924.html#ixzz1juUkC1Rb
Under Creative Commons License: Attribution

Astroraji 9995361657

2012-01-15T00:42:00.001+05:30

http://astroraji9995361657.blogspot.com

ജ്യോതിഷസംബന്ധമായ അറിവുകളും അനുഭവങ്ങളും പങ്കുവയ്ക്കുകയാണ്.

ഒരു ദിവസം കൊണ്ട് തീരുന്ന പ്രവര്‍ത്തനമല്ല ഞാന്‍ തുടങ്ങി വയ്ക്കുന്നത് എന്ന് അറിയാം. എല്ലാവരുടേയും അനുഗ്രഹങ്ങള്‍ ഉണ്ടാകണേയെന്നു പ്രാര്‍ത്ഥിക്കുന്നു.

നവംബര്‍ 5

2011-10-22T20:26:00.001+05:30

അങ്ങനെ .... അങ്ങനെ ..... അന്‍പതിലെത്തി.

ഇനിയാരും മറക്കല്ലെ കേട്ടോ...

സഖീ,,,,,,,

2011-06-13T17:10:00.000+05:30

സഖീ, യൊരാളിങ്ങു കദനഭാരമായ്

മു‍ഖമൊളിപ്പിക്കാനിടങ്ങള്‍ തേടുന്നൂ....

ഉറങ്ങാത്തവര്‍ക്കു്.....

2011-03-17T01:33:00.001+05:30

ഉറക്കം വരാത്ത

ആയിരത്തൊന്നു രാവുകളില്‍

നൊന്തുപെറ്റ

മയില്‍പ്പീലിക്കുഞ്ഞുങ്ങളും

കുപ്പിവളത്തുണ്ടുകളും

മഞ്ചാടിമണികളും

ആകാശത്തോളം വളര്‍ന്ന

കൌമാരം,

നീ ചാരി നിന്ന

വെയിറ്റിംഗ് ഷെഡ്ഡിന്

എന്തൊരു ക്ഷമ !

അതിപ്പോഴും

അങ്ങനെതന്നെ

കാത്തു നില്‍ക്കുന്നു…

അവിടേയ്ക്ക്…

ഒരിക്കല്‍ കൂടി….

ഇപ്പോള്‍ കണ്ണു നിറയുന്നത്

ഉറക്കത്തിന്

എണ്ണാനറിയാത്തതു കൊണ്ടാണ്..!

ഉറക്കം വരാത്തത്

ആയിരത്തൊന്നു രാവുകള്‍ക്കല്ലല്ലോ…

നിന്നെയും തേടി...

2011-03-16T01:30:00.003+05:30

നാളുകള്‍ തീരാറാകുന്നു....

ഇനി കാണണം.
അതിന്,,,,

അന്നത്തെ
വെയിറ്റിംഗ് ഷെഡ്ഡിലും
സിനിമാതിയറ്ററിലും
പാര്‍ക്കിലും....

ഒടുവില്‍
എന്റെയുള്ളിലും.....

PROTEST MARCH AGAINST THE RECOMMENDATIONS OF THE 9th PAY REVISION COMMISSION CONDUCTED BY GSTU ATTINGAL

2011-01-12T11:31:00.001+05:30

ശ്രീ മുഹമ്മദ് റാഫി സാറില്‍ നിന്ന് ......

2010-12-12T23:29:00.002+05:30

G S T U സെക്രട്ടറി ശ്രീ മുഹമ്മദ് റാഫി സാറില്‍ നിന്ന് കവിതയ്ക്കുള്ള പുരസ്കാരം...

[[എന്‍ഡോസള്‍ഫാന്‍]]

2010-12-12T17:24:00.000+05:30

ചതുരവലയങ്ങള്‍

എല്ലാ നിനവിടങ്ങളേയും

ഒരുമിച്ചു ചേര്‍ക്കുന്നു...

നെഞ്ചിലേയ്ക്കേറ്റും മുന്‍പേ

തിളച്ചു തൂവിയ ആണവ ചേതന

അശുദ്ധമാക്കപ്പെട്ട ജനിതകതീര്‍ത്ഥം.

ലിറ്റില്‍ബോയിയില്‍ നിന്ന്

എന്‍ഡോസള്‍ഫാനിലേയ്ക്ക്

ചതുരവലയങ്ങളുടെ മേല്പാലം.

കാലം

പ്രണയത്തിന്റെ വലക്കണ്ണികളില്‍

മൂടുപടങ്ങള്‍

നിറഞ്ഞൊഴുകുന്ന സ്ഖലനതാപം

യുദ്ധത്തിന്റെ നെടുവീര്‍പ്പുകള്‍

കാലം, പ്രണയം, യുദ്ധം

പരസ്പരം വിസ്ഥാപിക്കപ്പെടുന്ന ത്രിത്വം

അവയ്ക്കിടയില്‍

ജീവിതം മരിച്ചു തീരുന്നു...

പരമേശ്വര്‍ജിയുമായുള്ള ഇന്‍റര്‍വ്യൂ

2010-12-06T15:15:00.001+05:30

പരമേശ്വര്‍ജിയുമായുള്ള ഇന്‍റര്‍വ്യൂ വായിക്കാന്‍ ശ്രീ മണിലാലിന്റെ sms കിട്ടിയപ്പോള്‍ ആഹ്ലാദം തോന്നി.

പരമേശ്വര്‍ജിയുമായി എനിക്കു വളരെ നാളത്തെ അടുപ്പമുണ്ട്.

എന്റെ ആദ്യ കവിതാസമാഹാരം "സരയു ഒഴുകന്നൂ..." പ്രകാശനം ചെയ്തതു് അദ്ദേഹമാണ്.

എന്റെ ചിന്തകളെ തേച്ചുമിനുക്കി ആദര്‍ശോന്മുഖമാക്കിയതും മറ്റാരുമല്ല.

സൂര്യകലഹം

2010-11-16T19:51:00.003+05:30

നീണ്ട ഇടനാഴിയിലൂടെ

കാലം കടന്നു പോകുന്നു

കിളിവാതിലുകളില്‍ ആ മുഖം മാത്രം ചിരിച്ചു കണ്ടില്ല

കാറ്റിലൊഴുകിയെത്തിയ മേഘത്തൂവലുകള്‍

ആത്മാര്‍ത്ഥതയുടെയും ആശംസയുടെയും

തിരുവെഴുത്തുകളായി അവതരിച്ചു

അവ

ഒറ്റപ്പെട്ടവന്റെ പരിഭവജ്വാലകളില്‍

സൂര്യകലഹമായി എരിഞ്ഞുയര്‍ന്നു

ലക്ഷ്യം മറന്ന പേപ്പാച്ചിലില്‍

നേട്ടങ്ങളുടെ

എല്ലിന്‍തുണ്ടുകള്‍ കിട്ടിയ നായ്ക്കൂട്ടങ്ങള്‍,

അഹങ്കാരച്ചിരി നുരയുന്ന ഓരിയിടല്‍,

മേല്‍പ്പോട്ടു തുപ്പുന്ന അവജ്ഞയും പുച്ഛവും

നിന്ദയുടെ നിഴലിളക്കം

ആദരവിന്റെയും അംഗീകാരത്തിന്റെയും

നനവകന്ന കാറ്റും

പാരസ്പര്യത്തിന്റെ പശിമയില്ലാത്ത

മണ്ണും മനസ്സും

പുറകിലുയര്‍ത്തുന്ന പൊടിപടലങ്ങള്‍

പുനര്‍സൃഷ്ടിക്കുന്ന

കാലത്തിന്റെ ഇടനാഴിയില്‍

നാം

നമ്മുടെ സൂര്യമുഖങ്ങള്‍

തിരിച്ചറിയുന്നു.

വിഭ്രമം

2010-11-13T10:28:00.000+05:30

കനത്ത മഴയില്‍
നനഞ്ഞു കുതിര്‍ന്ന ഇന്നലെ;

ചിത്രശലഭത്തിന്റെ
വര്‍ണ്ണച്ചിറകുകള്‍
ഓരോന്നായി
അണിഞ്ഞെത്തിയ
വിഭ്രമം

കണ്ണുകളില്‍ നിന്ന്
കനല്‍ത്തുള്ളികള്‍

ആരുടേതെന്നറിയാതെ
തമ്മില്‍ തിരയുന്ന പാദങ്ങള്‍

നഖങ്ങളിലൂടെ
വിരലുകളിലൂടെ
നീലഞരമ്പുകളിലൂടെ
നനുനനുത്ത രോമങ്ങളിലൂടെ

ആകാശനിഗൂഢതകളിലേയ്ക്ക്
പടര്‍ന്നു കയറുന്ന
നീലക്കുരുവി....

Sunday, August 15, 2010

സ്ക്വിഡൂ...

2010-11-08T16:47:00.000+05:30

I have created a new lens on squidoo.

Please visit my new lens and bless me.

നീലക്കുരുവി..

2010-11-06T10:32:00.000+05:30

ഇന്ന് അമാവാസി.

അമാവാസിയുടെ ഇരുള്‍ക്കയങ്ങള്‍ക്കുമേല്‍.....
ചുട്ടുപഴുത്ത വികാരങ്ങളടക്കിപ്പിടിച്ച്
വീര്‍പ്പുമുട്ടി നില്ക്കുന്ന കാര്‍മേഘപടലങ്ങള്‍.....

അവയ്ക്കിടയിലൂടെ
ചിറകടിച്ചുയരുന്ന നീലക്കുരുവി.....

ശാരീരികവും
മാനസികവും
വൈകാരികവും
ആത്മീയവുമായ
എല്ലാത്തരത്തിലുമുള്ള
അടക്കിപ്പിടിയ്ക്കലുകളെയും മറികടന്ന്.....

ആത്മസുഖാനന്ദത്തിന്റെ
അതിരുകളില്ലാത്ത
നീലവിഹായസ്സിലേയ്ക്ക്.....

പൂര്‍ണ്ണിമയിലേയ്ക്ക്.....

തിളച്ചുരുകുന്ന
സൂര്യന്റെ തീക്ഷ്ണസത്യങ്ങളിലേയ്ക്ക്

നിന്നോടൊപ്പം...

Sunday, August 8, 2010

രാഗസര്‍പ്പങ്ങള്‍...

2010-11-01T10:25:00.001+05:30

ഞാന്‍
കാലരേതസ്സിന്റെ
കാണാനൂലിഴകളില്‍
നെയ്തെടുത്ത
രക്ഷാകവചമായ്
നിന്നെപ്പൊതിയുമ്പോള്‍

പേടിയുടെ
ഉടുപ്പുകളോരോന്നായി
നീ
അഴിച്ചു മാറ്റൂ....

മന്ത്രമര്‍മ്മരങ്ങളുടെ
നനുനനുത്ത വര്‍ണ്ണങ്ങള്‍
മാത്രമണിഞ്ഞ്
കാറ്റിന്റെ കരവലയങ്ങളില്‍
നറുമണം പോലെ
അഭയത്തിന്റെ
ഓങ്കാര നാദമായി
നീ
എന്നിലേയ്ക്ക്
അലിഞ്ഞു തീരുമ്പോള്‍

നിമിഷങ്ങള്‍:
തലമുറകളിലേയ്ക്ക്
പകര്‍ന്നാടുന്ന
രാഗസര്‍പ്പങ്ങള്‍...

ആത്മസുഖത്തിന്റെ
ശിശ്നമുഖത്ത്
ഊറി നിറയുന്ന
ആനന്ദാശ്രു

സ്നേഹ രസനയുടെ
കൂര്‍ത്ത
രസാഗ്രത്തിലെ
അഗ്നിമേളം

അംഗീകാരം

2010-10-29T21:51:00.001+05:30

ഞാന്‍ Tiddlyspace ല്‍ rajichandrasekhar എന്ന Space തുടങ്ങിയ കാര്യം എഴുതിയിരുന്നല്ലൊ.

Tiddlyspace ലെ Featured വിഭാഗത്തില്‍ rajichandrasekhar നും സ്ഥാനം ലഭിച്ചിരിക്കുന്ന വിവരം സസന്തോഷം അറിയിക്കട്ടെ.

എന്നെ വായിക്കുകയും പ്രോത്സാഹിപ്പിക്കുകയും ചെയ്തുകൊണ്ടിരിക്കുന്ന എല്ലാവരോടും എനിക്കുള്ള സ്നേഹവും കടപ്പാടും ഇവിടെ രേഖപ്പെടുത്തുകയാണ്.

അക വിത

2010-10-24T13:08:00.002+05:30

ഞാന്‍ അകത്തു് വിതച്ചതൊക്കെ സമാഹരിച്ച് സൌജന്യമായി നല്കുവാന്‍ ആഗ്രഹിക്കുന്നു.

അക വിത 10.10 ക്ലിക്ക് ചെയ്താല്‍ അക വിത 10.10.html എന്ന ഒറ്റ ഫയലായി എന്റെ കവിതകള്‍ നിങ്ങളുടെ കംപ്യൂട്ടറിലേയ്ക്ക് ഡൌണ്‍ലോഡ് ചെയ്യാം.

വിവരം അറിയിക്കുമല്ലൊ....

My Sincere Thanks to Tiddlyspace.

സ്നേഹപൂര്‍വ്വം
Raji Chandrasekhar

ദീക്ഷിതന്‍

2010-07-17T10:10:00.002+05:30

ഞാന്‍ വന്നു ചോദിച്ചു പ്രണയഭിക്ഷ

ദേവി നീ തന്നതീ പ്രണയദീക്ഷ

കറുപ്പ്

2010-07-04T21:07:00.005+05:30

മാര്‍ക്സ് പറഞ്ഞതും ശരി ആണെന്ന്

വഴിയരികില്‍

ഒരു കൈപ്പത്തി

അക്രമികള്‍

അവര്‍ മയക്കുമരുന്നിന്റെ

അടിമകളല്ലെ !

മയക്കുമരുന്നിന്റെ

വിതരണക്കാരെ....?

ഹൃദയത്തില്‍ നിന്ന്

2010-02-24T12:20:00.001+05:30

രാത്രിയിലെ
ഓരോ യാമങ്ങളും
മനസ്സിന്റെ തേനറകളില്‍
മധു നിറയ്ക്കട്ടെ....

ബാലകവിതകള്‍

2009-05-26T22:30:00.002+05:30

കാരണവരുടെ ചിരി

2009-05-26T18:56:00.009+05:30

പിള്ളേരുടെ ബഹളവും കളികളും കണ്ട്, ഉമ്മറക്കോലായിലെ ചാരുകസേരയില്‍ കിടക്കുകയായിരുന്നു കാരണവര്‍.

അനന്തരവന്മാരും സംബന്ധക്കാരും ഭരണം ഏറ്റെടുത്തതില്‍ പിന്നെ പണിയൊന്നുമില്ല.

അവര്‍ സമ്മതിച്ചിട്ടു വേണ്ടെ...

ആശയുണ്ട് മിണ്ടിയില്ല എന്ന മട്ടിലാണ് ഇപ്പോള്‍ കാര്യങ്ങളുടെ കിടപ്പ്.

കാരണവരെ ഒതുക്കിയതിന്റെ സന്തോഷത്തില്‍ പിള്ളേരെല്ലാം കൂടി മുറ്റത്ത് കളിച്ചു തിമിര്‍ക്കുകയാണ്. കുസൃതിക്കൊട്ടും കുറവില്ല.

മുറ്റത്തെന്തൊക്കെയോ മറിഞ്ഞു വീഴുന്ന ശബ്ദം കേട്ട്, കാരണവരൊന്ന് തല പൊക്കി നോക്കി. ദാണ്ടെ പിള്ളേരെല്ലാം മുറ്റത്ത് മറിഞ്ഞടിച്ച് കിടക്കുന്നു.

ഒരുത്തന്‍ എഴുന്നേറ്റു നില്പുണ്ട്, രണ്ടു മൂന്നെണ്ണം പാതിയെഴുന്നേറ്റ മട്ടിലും. ബാക്കിയെല്ലാം പടും കിടപ്പു തന്നെ.

അതു കണ്ടപ്പോള്‍ കാരണവര്‍ തന്റെ കുട്ടിക്കാലം ഓര്‍ത്തുപോയി.
ആ ചുണ്ടുകളില്‍ അറിയാതൊരു ചിരി വിടര്‍ന്നു. ( അതൊ, കസേരയ്ക്കു പുറകില്‍ നിന്ന് ആരെങ്കിലും ഇക്കിളി കൂട്ടിയതാണോ...)

"ഞങ്ങളുടെ മക്കള്‍ വീണപ്പോള്‍ കാരണവര്‍ ചിരിക്കുന്നോ...? ഇതൊടുക്കത്തെ ചിരി തന്നെ.. കാണിച്ചു കൊടുക്കാം. " ആരൊക്കെയൊ പിറുപിറുക്കുന്നു.

കസേരയില്‍ നിന്ന് കാരണവരെ വലിച്ചു താഴെയിടാന്‍ തക്കം പാര്‍ത്തിരുന്ന അനന്തരവന്മാര്‍ക്കും സംബന്ധക്കാര്‍ക്കും വാശി കൂടി.

അവരൊരുമിച്ചുകൂടി കാരണവരുടെ കാലു പിടിക്കാന്‍ ആഞ്ഞടുത്തു. (വലിച്ചിടാനാണേ..)

ആ വരവു കണ്ടപ്പോള്‍ കാരണവര്‍ക്കു വീണ്ടും ചിരി പൊട്ടി.

26-05-09

കാര്‍ട്ടൂണ്‍ കവിതകള്‍

2009-05-25T22:12:00.000+05:30

പ്രണയവാത്സല്യം

2009-05-24T08:54:00.004+05:30

ഒരു

ദിവസമാണെങ്കിലും

കാണാതിരിക്കാന്‍

പ്രയാസമാണല്ലൊ

കുഞ്ഞെ….

ഇതു പ്രണയമല്ലല്ലൊ….?

ബന്ധനങ്ങളുടെ

നനുനനുത്ത

നൂലിഴകളില്‍

തലങ്ങും വിലങ്ങും

വരിഞ്ഞു മുറുകുമ്പോള്‍

ഇനിയെന്തു പ്രണയം……

നീ

പ്രണയത്തില്‍ നിന്ന്

വാത്സല്യത്തിലേയ്ക്കെന്നെ

വലിച്ചെടുക്കുമ്പോള്‍

ഉണ്മയുടെ

അമൃതകുംഭങ്ങള്‍ നിറയുന്നു.

നീ

ചിരിനിലാവ്….

എന്നാലും

കാണാതിരിക്കാന്‍

വയ്യ…….

26-02-2009

സിനിമയിലെ വില്ലന്മാര്‍

2009-05-23T08:51:00.001+05:30

സിനിമയിലെ വില്ലന്മാര്‍

ഇപ്പോള്‍

ബലാത്സംഗം ചെയ്യാറില്ല.

വലിച്ചു കീറാനോ

ഉരിഞ്ഞെറിയാനോ

ഉടുതുണികളില്ലാഞ്ഞിട്ടല്ല.

പ്രായം കൂടിയതുകൊണ്ടോ

ആവതില്ലാത്തതുകൊണ്ടോ

അല്ല.

ചെറുപ്പക്കാരായ

ചെറുമക്കളെ

പരിശീലിപ്പിക്കുകയാണ്.

അവര്‍ക്കാണ്

അത്തരം ജോലികള്‍…

അല്ലെങ്കിലും

അതിപ്പൊ

അങ്ങനെയൊക്കെത്തന്നെയാണല്ലൊ

ജീവിതത്തിലും…….

വില്ലന്മാര്‍

വയസ്സായി

മന്ത്രിമാരാകുമ്പോള്‍

അവരുടെ മക്കള്‍…

മന്ത്രിപുത്രന്മാര്‍….

18-02-2009

കടലിനോട്...

2009-05-22T18:21:00.003+05:30

കടലിനോടൊരു കര കരയുന്നു
കടന്നു കേറിയെന്നഹന്തയെ‍ ദ്രുതം
അതിക്രൂരം മണല്‍ത്തരികളാക്കു നി‍ന്‍
പ്രതിരോധത്തിരപ്പകക്കുതിപ്പിനാല്‍....

22-05-09

കടലിളകുന്നു…

2009-05-22T08:44:00.000+05:30

കടലിളകുന്നു…

കരയെപ്പുല്കുവാന്‍.

കരവിരുതിനാലുണര്‍ത്തുവാന്‍

പതഞ്ഞു പൊങ്ങിടും

ലഹരികള്‍ മെല്ലെ

കിതച്ചു താഴുമ്പോള്‍

തളര്‍ന്നു നിന്നെയും

പുണര്‍ന്നുറങ്ങുവാന്‍

മനമുണരുന്നു

കടലിളകുന്നു…

18-02-2009

പര പരാ വെളുക്കുന്നു

2009-05-21T20:34:00.000+05:30

പര പരാ വെളുക്കുന്നു

പുലരി കണ്മിഴിക്കുന്നു

അകത്തൊരാളുണരുന്നു

അരികില്‍ കൈ പരതുന്നു

മണിവീണക്കുടങ്ങളില്‍

വിരലുകളിഴയുന്നു

ലഹരിതന്നലകളില്‍

ഉടലുകളൊഴുകുന്നു

പതഞ്ഞാകെ നിറയുന്നൊ-

രലകടല്‍ കടയുവാന്‍

കടകോലായൊരു ജന്മ-

മുരളിക വിതുമ്പുന്നു.

മലകളില്‍ നനവൂറും

മലരിതള്‍ ചരിവിലും

അടിമുടിയുരുകും പൊന്‍-

വെയിലായിപ്പടരുന്നു…

20-02-2009

റയില്‍ പാളങ്ങള്‍

2009-05-19T08:06:00.000+05:30

ആരോ ലിവര്‍ വലിക്കുമ്പോള്‍

വിട്ടു നില്‍ക്കാനടുക്കുവാന്‍

റയില്‍പ്പാളങ്ങളാകണം

ചക്രത്തിന്‍ കോപതാപങ്ങള്‍

ക്രൂരം സമ്മര്‍ദ്ദമേകുമ്പോ-

ളിളം പുഞ്ചിരി തുകണം.

കള്ളനെക്കാവലേല്‍പ്പിക്കാ-

നവര്‍ക്കും കൂട്ടു നില്‍ക്കുവാ-

നകക്കണ്ണുമടയ്ക്കണം.

കഷണ്ടിക്കാ,രസൂയക്കാര്‍,

ദേവന്മാര്‍, കുംഭയുള്ളോരും

കല്‍പ്പിക്കും പോലെ നീങ്ങണം

ലക്ഷ്യങ്ങള്‍ നേടാന്‍ തമ്മില്‍

ചിരിച്ചും കത്തിയാഴ്തുവോര്‍-

ക്കെന്നെന്നും സ്തുതി പാടണം

അവര്‍ക്കു പൂജാപുഷ്പങ്ങ-

ളിറുക്കാന്‍ കോര്‍ത്തൊരുക്കുവാ-

നനുരാഗം ത്യജിക്കണം.

അവര്‍ക്കായ് മോഹലക്ഷങ്ങള്‍

സ്വാര്‍ത്ഥങ്ങള്‍ വെന്നു നേടുവാ-

നുള്ളം കണിക്കയേകണം.

ഇല്ലെങ്കിലിവിടെ സ്ഥാനം

നല്‍കില്ലേതൊരു മാര്‍ഗ്ഗവും

തേടും പുകച്ചു ചാടിക്കും.

അവര്‍ക്കിച്ഛാപൂര്‍ത്തിക്കോ

പ്രസ്ഥാനം, സ്ഥാപനം പിന്നെ

റയില്‍പ്പാളങ്ങള്‍ - നമ്മളും.

അവര്‍ക്കു പാളമാകാതുള്‍-

ക്കരുത്തിന്‍ കാന്തമായിടാം

വീരഗാഥ കുറിച്ചിടാം...

8-07-1991

സ്നേഹം

2009-05-18T18:18:00.003+05:30

ഒരിക്കല്‍
വിവശനായി
ഞാന്‍
നിന്നടുക്കലേക്കോടിയെത്തി.

പക്ഷെ
അപ്പോഴേയ്ക്കും
നീ എവിടേയ്ക്കോ പോയ്ക്കഴിഞ്ഞിരുന്നു.

കൂട്ടിലിട്ടോമനിച്ചു വളര്‍ത്തിയ
കിളിയെ
തുറന്നു വിട്ടത്
സ്നേഹം കൊണ്ടു മാത്രമാണ്.

ഒന്നുമാകാത്തവരുടെ
ഒന്നിനുമാകാത്തവരുടെ
ഗതികേടിനെ
സ്നേഹം എന്നും വിളിക്കാം...

കാരണം
ഇതിന്ത്യയാണ്
നാം
ഇന്ത്യാക്കാരാണ്..

13-02-09

കവിതയെഴുതുമ്പോള്‍

2009-05-17T23:25:00.002+05:30

കവിതയെഴുതുമ്പോള്‍
നീ അരികിലില്ലല്ലൊ....

അകല്‍ച്ചയുടെ ഊര്‍ജ്ജവലയങ്ങളില്‍
വിയര്‍ക്കുന്ന വിശപ്പ്

വിഭ്രാന്തിയുടെ അഗ്നിപര്‍വ്വതം
തീമുഖത്ത് ചുണ്ടുരുമ്മുന്ന നീലാകാശം
വിടരുന്ന ചിരിത്തുണ്ടുകള്‍

ദൂരെ ദൂരെ
ഒരുമിച്ചു ചേരുന്ന
സമാന്തര രേഖകള്‍

നീ എന്നോടു പറയാന്‍ കൊതിച്ച
ഒരുപാടു കാര്യങ്ങള്‍

ഞാന്‍
മൂളിക്കേട്ടുകൊണ്ടേയിരിക്കുന്നു

കവിതകളീല്‍....

ഗൂഗിളിന്റെ ആഡുകള്‍

2008-11-23T12:08:00.006+05:30

ബ്ലോഗു ചെയ്തു തുടങ്ങിയത് എന്തിനായിരുന്നു..?

കവിതയെഴുതുന്നതെന്തിനാണ്.. മറു സാഹിത്യ സാംസ്കാരികപ്രവര്‍ത്തനങ്ങള്‍ എന്തിനാണ്.. എന്നൊക്കെ സ്വയം ഉയ൬ത്തേണ്ട ചോദ്യങ്ങളാണ്. ഉത്തരം നൂറ്റാണ്ടുകള്‍ക്കു മുന്‍പേ പറഞ്ഞുകഴിഞ്ഞിരിക്കുന്നു, "കാവ്യപ്രയോജന"ത്തെക്കുറിച്ചുള്ള ചര്‍ച്ചയില്‍‍.

ആരൊക്കെയാണ് അറിയപ്പെടുന്ന കവികള്‍ ...?
ആയിരക്കണക്കിനു കവികള്‍ അറിയപ്പെടാതെ പോയതെന്തുകൊണ്ടാണ്..

ഇതൊന്നും ഓര്‍ക്കാതിരിക്കുന്നതാണ് നല്ലത്.

പണം അത്യാവശ്യയിരുന്നു.
ഒരു പരിഹാരമായി ഗൂഗിള്‍ കുറെ ആഡ്-കളെ തന്നു.
കറവ തീരെയില്ല.
കെട്ടിയ പറമ്പിന്റെ കുഴപ്പമായിരിക്കും.
എന്തായായാലും അവരതിനെ അഴിച്ചോണ്ടു പോയി.

ചന്തയില്‍ നിന്ന് വേറെ കുറെ ആഡ്-കളെ കൊണ്ടുവന്നിട്ടുണ്ട്.
കെട്ടി നോക്കട്ടെ..

രാമുവും ശംഭുവും മാലയിട്ടു...

2008-11-20T22:25:00.002+05:30

മാലയിടുന്നത് വീട്ടില്‍ വച്ചുതന്നെ. എന്റെ പൂജാമുറിയില്‍ ഞാന്‍ തന്നെ പൂജിച്ച് കുട്ടികളെ മാലയിടീക്കും. അതാണ് പതിവ്. ശബരിമലയ്ക്കു പോകുന്നത് ആദ്യമായല്ല.

ഇത് 2004-ലെ കാര്യമാണ്.

ഇതാണ് രാമുവും ശംഭുവും.

ശംഭു ഇളയ മകനാണ്.

ഞങ്ങള്‍ മൂന്നു പേരുമാണ് വീട്ടില്‍ നിന്നു പുറപ്പെടുന്നത്.

രാമു വലിയ കുട്ടിയല്ലെ, അവന് എല്ലാം ചെയ്യണമെന്നുണ്ട്.

കെട്ടു നിറയ്ക്കുന്നതും വീട്ടില്‍ വച്ചു തന്നെയാണ്. ശുഭയുടെ അച്ഛന്‍ പതിവുപോലെ വന്ന് കെട്ടു നിറയ്ക്കേണ്ട രീതിയില്‍ നിറച്ചു തരും. ആദ്യം ശംഭുവിന്റെ...

അതു കാണാന്‍ ശുഭയോടൊപ്പം അച്ഛനമ്മമാരും. (K S T A യുടെ കലണ്ടര്‍ ഫോട്ടോയില്‍ വരാന്‍ വേണ്ടി തൂക്കിയതല്ല. ജോലി കിട്ടിയപ്പോള്‍തന്നെ KSTA യില്‍ അംഗമായതാണ്. രാഷ്ട്രീയം നോക്കിയല്ല, അടുത്ത സുഹൃത്തുക്കളെല്ലാം KSTA-ക്കാരായിരുന്നു. അങ്ങനെയാണ് ഞാനും KSTA-യിലെത്തിയത്. കണിയാപുരം സബ്‍ജില്ലയില്‍, സബ്‍ജില്ലാക്കമ്മറ്റി അംഗമായും സജീവമായി പ്രവര്‍ത്തിച്ചിരുന്നു. HSA ആയപ്പോള്‍ പാലോട് സബ്‍ജില്ലയിലായി. പിന്നെ ആറ്റിങ്ങല്‍ സബ്‍ജില്ലയിലായപ്പോള്‍ പ്രവര്‍ത്തന ചുമതലകളൊന്നുമില്ലാതായി. ഞാന്‍ ആദ്ധ്യാത്മികതയില്‍ കൂടുതലായി മുഴുകാനും തുടങ്ങി.)

ശംഭുവിന്റെ കഴിഞ്ഞാല്‍ ....

പിന്നെ രാമുവിന്റെ..

പിന്നെ എനിക്കും.

അമ്മ രാമുവിനും...

ശംഭുവിനും ഇരുമുടിക്കെട്ടു തലയില്‍ വച്ചു കൊടുക്കുന്നു.

പമ്പയിലെത്തി. ഒപ്പമുള്ളത് ഹരിയാണ്.

സന്നിധാനത്തില്‍...

വിരിവച്ച്.....

മക്കള്‍ അല്പം ഉറങ്ങി.

രാവിലെ ശാസ്തവട്ടം ഷാജിയോടൊപ്പം.

അദ്ദേഹം ഇപ്പോള്‍ കഴക്കൂട്ടം ബ്ലോക്ക് പഞ്ചായത്ത് അംഗമാണ്.

മടങ്ങി വരും വഴി...

പുഴയിലിറങ്ങി ഒരു കുളി കൂടിയായപ്പോള്‍

മക്കളുടെ ക്ഷീണമെല്ലാം മാറി.

കഴിഞ്ഞ വര്‍ഷം തിരക്കു കാരണം സന്നിധാനത്ത് എത്താന്‍ കഴിഞ്ഞില്ല.

സരയു ഒഴുകുന്നൂ

2008-11-07T22:47:00.004+05:30

കനല്‍ക്കട്ടകള്‍

2008-11-07T22:36:00.006+05:30

അവതാരിക

കാല്‍പനികതയുടെ കസ്തൂരി പൊടിയുന്ന കവിതകള്‍

ഉള്ളടക്കം

പ്രാണസ്പന്ദങ്ങള്‍/ സ്നേഹധൂളികള്‍

2008-10-23T18:07:00.005+05:30

കവിത പോസ്റ്ററുകളുടെ പോസ്റ്ററാണ്.

2008-08-20T19:00:00.000+05:30

കാലഘട്ടത്തിന്റെ ആവശ്യാനുസരണം കരുത്തുള്ളവര്‍ കടന്നു വരുകയും

പോസ്റ്റര്‍ ഒട്ടിക്കുകയും ചെയ്യുന്നു.

കവിത പോസ്റ്ററുകളുടെ പോസ്റ്ററാണ്.

അധിനിവേശത്തിന്റെ കൈയ്യും കരുത്തും

2008-08-16T05:43:00.009+05:30

അവരുടെ
അധിനിവേശം…
ആക്രമണങ്ങളിലൂടെ,
കച്ചവടങ്ങളിലൂടെ...
ആശയങ്ങളിലൂടെ…

ആക്രമണകാരികള്‍ക്ക് ആയുധങ്ങളുണ്ട്,
കച്ചവടക്കാര്‍ക്ക് പരസ്യവും പ്രലോഭനങ്ങളുമുണ്ട്,
ആശയങ്ങള്‍ക്ക് പാഠപുസ്തകങ്ങളും.

അധിനിവേശങ്ങള്‍ക്കൊടുവില്‍
അവര്‍
രാഷ്ട്രീയത്തിന്റെയും
മതത്തിന്റെയും പേരില്‍
‍ഗ്രാമങ്ങളും
ജില്ലകളും
സംസ്ഥാനങ്ങളും
രാജ്യങ്ങളും
സൃഷ്ടിക്കും.

വീണ്ടും
തമ്മിലടിപ്പിക്കുന്ന
പാഠപുസ്തകങ്ങളുണ്ടാക്കും…..

നാംഅധിനിവേശങ്ങളുടെ
കൈയ്യും കരുത്തുമാകും.

ചേരാന്‍....

2008-08-16T01:28:00.000+05:30

തീരം നീ,യവിടേയ്ക്കു വന്നണയുവാ-
നോളങ്ങളാകട്ടെ ഞാന്‍
നേരം നീ ഹൃദയത്തുടുപ്പിലലിയും
നേരായി മാറട്ടെ ഞാന്‍
താരം നീ,യരുണാഭ ചേര്‍ന്നു മരുവും
പൂവായ് മരിക്കട്ടെ ഞാന്‍
ചേരാന്‍ മാമക നോവു നിന്‍ തനുവിലെ-
ത്താരുണ്യപുഷ്പങ്ങളില്‍

എന്തേ ഭയക്കുന്നു …

2008-08-15T01:00:00.000+05:30

കണ്ണുകള്‍ വേലിക്കകത്തേയ്ക്കു കാറ്റുപോ-
ലുണ്ണാത്തൊരുള്ളിന്റെ ആര്‍ത്തിപോലെ,
എത്തുമെന്നോര്‍ത്തു കിടുങ്ങുന്നുവോ ചിത്ത-
മിത്ര,മേലെന്തേ ഭയക്കുന്നു നീ….
ഇല്ല, നിന്‍ പൂങ്കാവിലേയ്ക്കെന്റെ വണ്ടുകള്‍
തേനുണ്ണുവാന്‍ മൂളിയെത്തുകില്ല.
വന്നെത്തിടും ക്ഷേത്ര മുറ്റത്തു ദേവിയെ-
ക്കണ്ടു കൈകൂപ്പുവാനെന്നുമെന്നും.

18-10-2007

ഇന്നെന്തു പറ്റീ…?

2008-08-14T01:00:00.000+05:30

ഇന്നെന്തു പറ്റീ…? ഘനശ്യാമമൂകയായ്
മുന്നില്‍ നിന്നെന്തേ മറഞ്ഞു നില്പൂ…?
ഇന്നലെക്കാര്‍മ്മുകില്‍ പെയ്തൊഴിയാഞ്ഞതോ
പിന്നെയും സംശയക്കോള്‍ നിറഞ്ഞോ ?
ഒന്നുമേ ചൊല്ലുവാനില്ലിനി,യെന്നു നിന്‍
പൊന്നിന്‍ കനവുകള്‍ പോയൊളിച്ചോ ?

17-10-2007

എന്നടുത്തൊന്നിരിയ്ക്കാന്‍

2008-08-13T01:32:00.000+05:30

സമര,മതു കഴിഞ്ഞാലെത്തിടും നീ മനസ്സി-
ന്നമര,മമര,മെന്നും കാത്തിടാനോര്‍ത്തു ഞാനും
സമയമലയിളക്കും സാഗരം താണ്ടിടേണം
സമയ,മെവിടെ,യെന്നാ,ലെന്നടുത്തൊന്നിരിക്കാന്‍‍ !

ഒമര്‍ഖയാം

2008-08-13T01:30:00.000+05:30

തിങ്ങും കാന്തികലര്‍ന്നുഷസ്സിലൊരു പൂ-
വെന്നോണ,മെന്നോമലാള്‍
തങ്ങും കാനനവും കടല്ക്കരകളും
പൂവാടിയാണെന്നൊരാള്‍
എങ്ങും കാമമയൂഖമാല തിരളും
വൃന്ദാവനം പോലെ, ഞാന്‍
മുങ്ങും കാവ്യസരിത്തിലായ് വിരിയുമെന്‍
തങ്കക്കിനാവെന്നു ഞാന്‍

സൌഹൃദം

2008-08-13T01:18:00.000+05:30

മിണ്ടാതെ പുഞ്ചിരി തൂകാതെ ഗൌരവ-
ച്ചുണ്ടു കൂര്‍പ്പിച്ചിടും സൌഹൃദം നീ.

15-10-2007

നമുക്ക് എല്ലാം സഹിക്കുകയും പൊറുക്കുകയും ചെയ്യാം

2008-08-03T17:25:00.003+05:30

സാംസ്കാരിക അധിനിവേശത്തിന്റെ
ദുരന്തഫലങ്ങളാണ്
ഇന്നു നാം അനുഭവിക്കുന്നത്.

അങ്ങനെ
കൈയ്യൂക്കും കൌശലവുമായി കടന്നു വന്നവര്‍ക്ക്
എന്തും ചെയ്യാം,
അവര്‍ ചെയ്യുന്നതൊക്കെയാണ് (അതു മാത്രമാണ്) ശരി
എന്ന തെറ്റായ ധാരണ
നമ്മുടെ അഭ്യസ്ഥവിദ്യരിലും‍
ആഴത്തില്‍ വേരു പിടിപ്പിക്കാന്‍,
അവരുടെ (അധിനിവേശക്കാരുടെ)
സംഘടിത ശക്തികൊണ്ടു സാധിച്ചിട്ടുണ്ട്.

നമുക്ക്
എല്ലാം സഹിക്കുകയും പൊറുക്കുകയും ചെയ്യാം.
അത് ഭീരുത്വം കൊണ്ടുമാത്രമല്ല,
നിവൃത്തികേടുകൊണ്ടുകൂടിയാണ്.

ഇനിയുമുണ്ടല്ലൊ അദ്ധ്യാപകര്‍...

2008-07-19T22:51:00.005+05:30

അദ്ധ്യാപകന്‍,
കേരളത്തിലെ പ്രബുദ്ധ ക്രൌര്യങ്ങള്‍ക്കു
പിഞ്ചു കുഞ്ഞുങ്ങളുടെ മുന്നിലിട്ടും
വെട്ടിക്കൊല്ലാനും ചവിട്ടിയരയ്ക്കാനും
ജന്മമെടുത്ത
"മതമില്ലാത്ത ജീവന്‍".

വഴിയില്‍ വീണുപോയ ചോറ്റു പാത്രം,
അനാഥമായ വാക്കുകള്‍,
മിഴി കുതിര്‍ന്ന സാരിത്തലപ്പുകള്‍.

ഭീമന്റേയും കീചകന്റേയും രക്ഷകര്‍ത്താക്കള്‍
വിരുന്നുണ്ടു പിരിയുമ്പോള്‍
തെളിവുകള്‍ മാഞ്ഞ്
അഴികള്‍ക്കിടയിലൂടൂര്‍ന്നു പോരുന്ന
കൊലക്കത്തികള്‍.

അക്രമികള്‍ ഒരിക്കലും ശിക്ഷിക്കപ്പെടില്ല,
രക്ഷകര്‍ത്താക്കള്‍ക്ക്
അവരെ
നാളെയും വേണം.

ഇനിയുമുണ്ടല്ലൊ അദ്ധ്യാപകര്‍...

......................................................................

അതി ശക്തമായ പ്രതിഷേധം എല്ലാ തുറകളില്‍ നിന്നും ഉയര്‍ന്നു കൊണ്ടിരിക്കുന്നു.

എനിക്കു പറയാനുള്ളത്: മഹാശ്വേതാദേവി

2008-06-28T01:32:00.000+05:30

എനിക്കു പറയാനുള്ളത്: മഹാശ്വേതാദേവി

"മഹാശ്വേതാദേവി"-യെ വല്ല്യമ്മായി പരിചയപ്പെടുത്തുന്നു...

സാമൂഹ്യപാഠങ്ങള്‍

2008-06-27T23:07:00.003+05:30

സാമൂഹ്യപാഠങ്ങള്‍

ജീവിതത്തോടൊപ്പം
കടം വാങ്ങിയ കാശും
തിരിച്ചു കൊടുക്കാനാകാതെ
ചിതയിലോ ചിതലിലോ
ഒടുങ്ങിയേക്കാവുന്ന
കുറെ വ്യാമോഹങ്ങള്‍....

ലോകബാങ്കൊരുക്കുന്ന
സാമൂഹ്യപാഠങ്ങളില്‍ നിന്ന്
പലിശയുടെ
ജലപീരങ്കികള്‍.

ചുവപ്പും കാവിയും പച്ചയും
നീരൊഴുക്കു നിലച്ച ഡാമുകള്‍.

കുത്തകകള്‍ക്ക്
അടിയറവു പറയുന്ന
ആശയങ്ങള്‍...

ഇസങ്ങള്‍
തെരുവുയുദ്ധങ്ങളില്‍
ചവുട്ടിയരയ്ക്കപ്പെടുന്ന
തുണിക്കീറുകള്‍

27-06-2008

ചേര്‍ത്തു വായിക്കാന്‍....

വാക്കുകള്‍ മരണത്തിനെ വെല്ലുവിളിക്കുമ്പോള്‍

2008-06-27T22:37:00.002+05:30

ഡിങ്ക-ന്റെ പോസ്റ്റ് -മരണത്തിലേക്ക് നടന്നു കയറിയ വാക്കുകള്‍
എന്നെ കുലുക്കിയുണര്‍ത്തുന്നു.

‍

ഏട്ടാ.....

2008-06-02T00:59:00.002+05:30

ഏട്ടാ, രാവിലെ,യെത്ര നേര,മവിടെക്കാത്തങ്ങു നിന്നാലു,മി-
ല്ലോട്ടോ റിക്ഷയൊരെണ്ണവും കയറുവാന്‍ ബസ്സോ വരുന്നില്ലതും
നെട്ടോട്ടം കുറയാനെനിക്കു,മുടനേ ബൈക്കൊന്നു വാങ്ങേണ,മി-ന്നോട്ടാനൊട്ടൊരു തട്ടുതന്നെ ചെറു കൈക്കുറ്റങ്ങളാര്‍ക്കും വരാം.

8-10-07

മൌനം

2008-05-31T00:56:00.001+05:30

മൌനം വജ്രകഠോരമായ് കരളിലേയ്ക്കാഴ്ത്തും മഹാമൌനമേ
മൌനം കൊണ്ടുമൊഴുക്കു നീ നിനവിലും സൌഹാര്‍ദ്ദതീര്‍ത്ഥങ്ങളെ
മൌനം മാമക ദേഹിയില്‍ വ്യഥകളായ് തീര്‍ക്കുന്നതെന്തിന്നു നീ
മൌനം പൂണ്ടകലാന്‍ വിരോധമിവനോടെന്തേയുണര്‍ന്നാളുവാന്‍ !

കോവളം കടല്‍ത്തീരം

2008-05-30T01:10:00.001+05:30

കോവളം, കടലാകെ ശാന്തമി,തെന്തു കാറ്റു കലമ്പിയോ !
കാവലായൊരു കോട്ട, മൌനമൊരുക്കിയോ സഖി ചുറ്റിലും.
നോവു, നിന്മിഴി,യോളമാലയി,ലേങ്ങലായ് വിലയിക്കുവാ-
നാവണം മമ ജന്മമാ,യൊരു തീരമായമരുന്നതും

രജി മാഷ്

2008-05-28T20:02:00.001+05:30

ആരാണ്
അങ്ങനെ
ആദ്യം വിളിച്ചതെന്നോര്‍മ്മയില്ല.
സ്നേഹത്തി്ന്റേയും ആദരവിന്റേയും
ഊഷ്മളത
അതില്‍ നിറഞ്ഞിരുന്നു.
തിരുവനന്തപുരത്തെത്തിയപ്പോള്‍
ആ വിളിയുടെ
സാന്ദ്രതയ്ക്കു
കുറവു വന്നെങ്കിലും
ആര്‍ദ്രതയ്ക്കു
മങ്ങലേല്ക്കാത്ത സൌഹൃദങ്ങളില്‍
അതു മുഴങ്ങുന്നു

ദൂരം

2007-10-03T17:29:00.001+05:30

കരുത്തുറ്റ
ഭാഷയുടേയും ചിന്തയുടേയും പാഠങ്ങള്‍
മരണത്തേയും ഒരു രാഷ്ട്രീയപ്രവര്‍ത്തനമാക്കി
കടന്നു പോകുമ്പോള്‍

നമുക്ക്

ഓര്‍മ്മിക്കുവാന്‍..

“പാഠത്തിന്റെ ഭാഷയെയാണ്
എല്ലാവരും വിമര്‍ശിച്ചത്.
ഭാഷാ ചര്‍ച്ചയിലാണ്
നമ്മുടെ രാഷ്ട്രീയ ചര്‍ച്ച.
കേള്‍ക്കണമെങ്കില്‍
ഈ ഭാഷ വേണം.
എന്നു പറഞ്ഞത് ’ബര്‍ണാഡ് ഷാ’ ആണ്.”

പറശ്ശിനിക്കടവ് SNAKE PARK-ലെ മിണ്ടാപ്രാണികളെ നിഷ്ക്കരുണം കൊന്നൊടുക്കിയതിനേയും പഠിപ്പിച്ചു കൊണ്ടിരുന്ന അദ്ധ്യാപകനെ പിഞ്ചുകുഞ്ഞുങ്ങളുടെ മുന്നിലിട്ട് വെട്ടിനുറുക്കിയതിനേയും ന്യായീകരിച്ച്, അതുപോലെയുള്ള മറ്റ് പ്രതിസന്ധികളിലും‍ തന്റെ പാര്‍ട്ടിയെ താങ്ങിനിര്‍‍ത്തിയ സൈദ്ധാന്തിക കേസരി.

പ്രത്യയശാസ്ത്രനിലപാടുകള്‍ മറക്കുന്നവരെ ചെവിക്കുപിടിച്ച് നേര്‍വഴി നടത്തുന്ന മാഷ് (ചിലര്‍ക്ക് വെറും കലാലയാദ്ധ്യാപകന്‍).

’അമ്മ കരയുന്നതെന്തിന് ?’- എന്നന്വേഷിച്ച്, അതിനു കാരണക്കാരായവരെ കണക്കറ്റു ശകാരിക്കുന്ന രാജ്യസ്നേഹി.

അതിന്റെ പേരില്‍ കോടതി കയറേണ്ടി വന്ന തന്റേടി.

കോടതിവിധി തന്റെ നിലപാടുകളെ ശരിവച്ചപ്പോള്‍ അഹങ്കരിക്കാതെ, ആരെയും പുലഭ്യം പറയാതെ, അഞ്ചാംപത്തികളെ അധികാരകേന്ദ്രങ്ങളില്‍ നിന്നു മാറ്റി നിര്‍ത്തണമെന്ന് ഉറക്കെ ഉദ്ഘോഷിച്ചവന്‍.

അവന്‍ കടന്നു പോകുമ്പോഴാണ് വിജയനില്‍ നിന്നു വിജയനിലേയ്ക്കുള്ള ദൂരം എത്രയധികമാണെന്നു നാം തിരിച്ചറിയുന്നത്.

മഷിത്തണ്ടു മണക്കുന്ന വാക്കുകള്‍

2007-09-15T18:41:00.000+05:30

മഷിത്തണ്ടു മണക്കുന്ന വാക്കുകള്‍

"അടക്കാനാവാത്ത സന്തോഷം മുഖത്ത്‌ വാരിനിറച്ച്‌. പറയുവാന്‍ ഒരുപാട്‌ വാക്കുകള്‍ തിരഞ്ഞ്‌, തിരഞ്ഞപ്പോള്‍ കിട്ടിയ വാക്കുകളില്‍ തൃപ്തി വരാഞ്ഞ്‌, പിന്നെയും തിരഞ്ഞ്‌......."

കഥകള്‍ പറഞ്ഞുകൊണ്ടേയിരിക്കട്ടെ, ഇനിയുമിനിയും മനു.

മനുവിനും കുടുംബത്തിനും ആയുരാരോഗ്യങ്ങള്‍ !

ആനുകാലികം

2007-09-14T22:55:00.000+05:30

ഇനിക്കാത്തു നില്ക്കേണ്ട....

2007-09-14T22:32:00.000+05:30

ഇനിക്കാത്തു നില്ക്കേണ്ട,
നമ്മില്‍ കിനാവിന്നിനിപ്പും
പുലര്‍കാലമഞ്ഞിന്‍ തണുപ്പും നിറയ്ക്കുന്ന മൌനം
മനസ്സില്‍ കനത്തു.

വെയില്‍ കത്തിയാളുന്നൊരിടവഴിയി-
ലൊരുമാത്ര നില്ക്കാതെ-
യൊരുവാക്കു മിണ്ടതെ,
കുളിര്‍തെന്നല്‍
മെല്ലെത്തലോടിക്കടന്നുപോയ്
ഇനിക്കാത്തു നില്‍ക്കേണ്ട.

സ്വാര്‍ത്ഥമോഹത്തിന്‍ ഗുഹയ്ക്കുള്ളി-
ലാസുരദര്‍പ്പത്തൊടേല്‍ക്കുന്നൊ-
രാത്മബന്ധം തോറ്റു.
ചക്രവാളത്തിലും ചെന്നിറം ചേര്‍ന്നു,
സാഗരം ക്രുദ്ധമായ്,
ഗഗനത്തി,ലിരുള്‍മേഘ,മിടിവെട്ടി.

വന്‍പാറ നീക്കി, ഗ്ഗുഹാമുഖം മൂടി-
ത്തിരിച്ചുപൊയ്ക്കൊള്ളുക
ദുഃഖസ്മൃതികളും
പ്രേതദാഹങ്ങളും
ചിതകെട്ടടങ്ങാതെ പൊങ്ങുന്ന ധൂമവും
തേങ്ങലും മാത്ര,മെനിക്കു തന്നേക്കുക.

ആനുകാലികം 1

നോവുകള്‍

2007-09-14T22:02:00.000+05:30

ദൂരെനിന്നഭയാര്‍ത്ഥികള്‍ മുറിപ്പെട്ട
മാനവും ദേഹവും പേറിയിങ്ങെത്തുന്നു.
വാളോ ഖുറാനോ, നിനക്കേതുവേണമെ-
ന്നോര്‍മ്മയിലാരോ വിളിച്ചു ചോദിക്കുന്നു.
ഇന്ത്യ നടുങ്ങുന്നഹിംസതന്‍ ശോഷിച്ച
തന്ത്രി തകര്‍ന്നൊരു തേങ്ങലുയരുന്നു.
മാതൃരക്തത്തില്‍ മുഖം കഴുകിക്കൊണ്ടു
നേതൃത്വമോഹികളിന്നും തിമിര്‍ക്കുന്നു.

ദൂരെ നിന്നെന്തേ മുഴങ്ങുന്നു, കാലന്റെ
കാലദേശങ്ങളെത്താണ്ടും കൊലവിളി.
പ്രേതങ്ങളോടും ചിലമ്പൊച്ച പൊങ്ങുന്ന-
തേതന്ധകൂപത്തില്‍ നിന്നാണു നിത്യവും
മന്ത്രവാദത്തിനായ് മാര്‍ക്സില്ലിസങ്ങളും
തന്ത്രങ്ങളൊതുങ്ങുന്നു കൂട്ടക്കൊലകളില്‍
പൊട്ടിത്തെറിക്കുമിസം തുരുമ്പിച്ചയണ്‍
കര്‍ട്ടന്‍ പലതായ് വലിഞ്ഞുകീറുന്നുവോ !
"തീര്‍ന്നില്ല വര്‍ഗ്ഗസമരങ്ങ,ളെത്രയോ
കാതങ്ങളായി, നാം ലക്ഷ്യത്തിലെത്തുമോ..?"

ദൂരെനിന്നാരവം കേള്‍ക്കുന്നതെന്തിനി-
പ്പോരിനിറങ്ങും സൃഗാലവൃന്ദങ്ങളോ !
ബൈബിളു,മപ്പവും തോക്കും മരണവും
കൈകള്‍ വിടര്‍ത്തി നില്ക്കുന്നൂ കുരിശുമായ്
വര്‍ണ്ണ വിവേചനം പീഡനം വെള്ളിയും
സ്വര്‍ണ്ണവു,മെങ്ങും നിറഞ്ഞൊഴുകീടവെ
പറ്റമായ് മുട്ടുകള്‍ കുത്തു,മജങ്ങള്‍തന്‍
കണ്ഠത്തി,ലാഴ്ത്തപ്പെടുന്നുണ്ടു കത്തികള്‍.

ആനുകാലികം 2

അമ്മിഞ്ഞപ്പാല്‍

2007-09-14T17:31:00.000+05:30

മതി നിറുത്തിടാ,മിരുളിലേക്കുള്ള
കുതിപ്പുക,ളേറെത്തളര്‍ന്നു ഞാന്‍ സഖീ

ഇവിടെല്ലാം നവ,മരുണരാശിയി-
ലുദിച്ചടങ്ങുമെന്നറിഞ്ഞു ഞാ,നിനി-
പ്പതുക്കെ,പ്പേരുകള്‍ പരസ്പരം പറ-
ഞ്ഞൊതുങ്ങിടാം ജന്മകുതൂഹലങ്ങളില്‍
വെറുപ്പു,മല്പാല്പ,മസൂയയും ചേര്‍ത്തു
തെറുത്ത താംബൂലം ചവച്ചരച്ചിടാം.

ചെറുപ്പത്തിലമ്മ പകര്‍ന്ന സ്നേഹവും
മറുപടിയായി,ക്കൊടുത്ത നിന്ദയും
പകലുറക്കത്തില്‍ വിളിച്ചുണര്‍ത്തവെ
പകച്ചുപോയൊരെന്‍ പകല്‍ക്കിനാക്കളും
സുവര്‍ണ്ണപാത്രം കൊണ്ടടച്ചതാം സത്യം
കവര്‍ന്നെടുക്കുവാനുഴന്ന ജന്മവും
യമനെ,ദ്ദാനമായ് തിരഞ്ഞു ചെന്നതും
അമല,മാത്മാവിന്‍ പൊരുളറിഞ്ഞതും
വെറുതെ, പ,ണ്ടമ്മ പകര്‍ന്നൊരമ്മിഞ്ഞ
നറും പാല്‍ മാത്രമാണറിവറിഞ്ഞു ഞാന്‍

ആനുകാലികം 3

കലങ്ങാത്തൊരുള്ളിന്റെ താളം

2007-09-14T17:04:00.000+05:30

മണല്ക്കാടുമൂടിത്തകര്‍ക്കാത്ത കുഞ്ഞോളമേളം
കലങ്ങാത്തൊരുള്ളിന്റെ താളം.

മലയ്ക്കപ്പുറത്തങ്ങു ദൂരത്തുനിന്നിങ്ങല-
ച്ചെത്തിടും കാറ്റു മുറ്റത്തുയര്‍ത്തും
പൊടിമണല്‍പ്പടരുകള്‍ക്കിടയിലൂടെപ്പൊഴും
തെളിനീരുറവയായൊഴുകുന്ന സാന്ത്വനം.

തൃണത്തുമ്പിളം കാറ്റിലാലോലമാട്ടുന്ന നീഹാരതാരം
ചിരിക്കും പ്രഭാതത്തിനോങ്കാരസാരം
യുവത്വം കുതിയ്ക്കുന്നൊരശ്വപ്രവേഗം
മണ്ണോടു ചേരാന്‍ കൊതിക്കുന്നൊടുക്കം.

വേദാന്ത വാക്യങ്ങളര്‍ത്ഥങ്ങള്‍ സര്‍വ്വവും
മിഥ്യയെന്നോതുന്ന വാക്കുകളെങ്കിലും
നിന്‍ചുണ്ടുമെല്ലെത്തുറക്കുമ്പൊളെന്നില്‍
നിറയുന്നൊരാശ്വാസ വര്‍‍ഷാന്തമേഘം.

മുളം തണ്ടുലഞ്ഞാടു,മടവികളിലുതിരു-
ന്നൊരലിവിന്റെ കളഗാനകേളി.
മലര്‍നീട്ടി നില്ക്കും ശുഭാശംസ, കണ്ണില്‍
മറക്കാത്ത മായാത്ത തൂമന്ദഹാസം.

മണല്ക്കാടുമൂടിത്തകര്‍ക്കാത്ത കുഞ്ഞോളമേളം
കലങ്ങാത്തൊരുള്ളിന്റെ താളം.

ആനുകാലികം 4

പകല്‍ വിശുദ്ധിയോട് വിയോജിക്കാം

2007-09-12T19:19:00.000+05:30

മലയാളം ബ്ലോഗേര്‍സിനെ അലട്ടിയ പോസ്റ്റ്, കമന്റ്, ചര്‍ച്ചകളെക്കുറിച്ച്....
ഞാനിത് എന്തിനെഴുതുന്നുവെന്ന് നിങ്ങള്‍ക്ക് മനസ്സിലാകും.

ചെറിയ മനുഷ്യരെ ഒരു നാട്ടിലും ആരും നായക-പ്രതിനായക പരിവേഷം നല്കി ആദരിക്കാറില്ല, അവരെക്കുറിച്ച് പൊടിപ്പും തൊങ്ങലും വച്ച കഥകളും പാടി നടക്കില്ല. അവര്‍ നല്ലകാര്യങ്ങള്‍ ചെയ്യാനും പൊതുവേദികളില്‍ പ്രത്യക്ഷപ്പെടാനും ഒക്കെ തുടങ്ങിയാലോ, എന്തായിരിക്കും സ്ഥിതി ?! അല്പം പണവും പ്രശസ്തിയും കൂടി വന്നു ചേര്‍ന്നാലത്തെ കഥ പറയുകയും വേണ്ട.ഇതൊക്കെ ലോക സ്വഭാവമാണ്.

മറ്റുള്ളവര്‍, തന്നേക്കാള്‍ ഒരുപടി എപ്പോഴും താഴ്ന്നിരിക്കണമെന്നാഗ്രഹിക്കുന്നവര്‍ ഇനിയും ധാരാളം ഉണ്ടാകും. വളര്‍ച്ചയുടെ ഏതെങ്കിലും ഒരു ഘട്ടത്തില്‍ അവരുടെ മനസ്സും സ്വഭാവവും അഗ്നിശുദ്ധമാകും.

ചെളി വാരിയെറിയുന്നവന്റെ കൈകളില്‍ മാത്രമല്ല, വഴിയെ പോകുന്നവന്റെ ദേഹത്തും ചെളി തെറിക്കാനിടയുണ്ട്. അതുകൊണ്ട്, അപ്പണി ആവര്‍ത്തിക്കരുത്.

അങ്ങേത്തലയ്ക്കലുള്ളയാള്‍ കേള്‍ക്കുവാന്‍ സന്മനസ്സും താത്പര്യവും കാണിക്കുന്നതുകൊണ്ടുമാത്രമാണ് ഇങ്ങേത്തലയ്ക്കല്‍ നിന്ന് പലമാതിരി വര്‍ത്തമാനങ്ങളും തുടരുന്നത്, എന്നു നമുക്കറിയാമല്ലൊ.

അക്ഷരക്കളികളുടേയും ദ്വയാര്‍ത്ഥങ്ങളുടേയും പ്രകടന ചടുലതകളില്‍ നിന്നൂറുന്ന ആനന്ദനിര്‍വൃതികളില്‍ അഭിരമിക്കുന്നവര്‍, അഭിനിവേശത്തിന്റെ ശാരീരികസമസ്യകളിലേക്ക് വഴുതി വീഴാതിരിക്കട്ടെ..

വിരല്‍മറവില്‍പ്പോലും പകല്‍മാന്യന്മാര്‍ പതറും. എന്നാല്‍ ഇരുള്‍മറവിലും അതിരുതാണ്ടാത്ത സൌഹൃദം നമുക്കു കാത്തുസൂക്ഷിച്ചുകൂടെ.

നമുക്ക് പകല്‍വിശുദ്ധിയോട് വിയോജിക്കാം, തമോവിശുദ്ധരാകാം.

മഞ്ചാടി

2007-09-11T17:45:00.000+05:30

1
മഞ്ചാടിപോലെന്റെ
കൈവെള്ളയി,ലിന്നു ചെഞ്ചോരയിറ്റുന്നൂ
ഒരു തുള്ളികൊണ്ടു നിന്‍ നെറ്റ്യില്‍ പൊട്ട്,
ചൊടിയിലും കവിളിലും
ചക്രവാളത്തിലും ചോരത്തുടുപ്പ്,
ചെമ്പരത്തിക്കു,മിച്ചെമ്പനീര്‍പ്പൂവിനു,
മെന്തിനു,മേതിനു,മംഗരാഗം !

2
മേലെ,ക്കറങ്ങുന്ന പങ്കയും മേശയില്‍
പാറുന്ന താളിലെ കൈവിരല്‍ത്താളവും
വീണു പിടയും കടക്കണ്ണൊളികളി-
ലൂളിയിടുന്നതാം ജന്മസാഫല്യവും
പാദം പുതയും തിളയ്ക്കുന്ന ടാറിനെ
മൂടിത്തിമിര്‍ക്കുന്ന മഞ്ഞിന്‍ കണങ്ങളും
തീച്ചൂള,യുള്ളിലും ചുറ്റിലും നീറുന്ന
സൂര്യ കിരണങ്ങള്‍ ചൊല്ലിയാടുന്നതും

അങ്ങേച്ചരിവിലെപ്പച്ചിലക്കാട്ടില്‍ നി-
ന്നിങ്ങോട്ടു പുഞ്ചിരിച്ചെണ്ടു നീട്ടുന്നൊരെന്‍
കൊച്ചു മലരിലെപ്പൂന്തേന്‍ നുകരുവാ-
നൊച്ചയില്ലാതെ വന്നെത്തുന്ന തുമ്പിയും
പാണന്റെ പാട്ടും കടുന്തുടിയൊച്ചയും
പ്രാണന്റെ കല്ലോലമാലിയില്‍ നീന്തവെ
’ദുഃഖമാണേകാന്ത സന്ധ്യകള്‍ !’ - മാമല
പൊട്ടിക്കരയുമെന്നുള്ളത്തില്‍
നിന്നൊരുതുള്ളി രക്തം

3
നാണയത്തുട്ടിനായ് നീട്ടിയ കൈകളും
നാണം മറയ്ക്കാത്ത വൃദ്ധനും വൃദ്ധയും
നാളെകളെന്നോ കരിഞ്ഞകിനാക്കളായ്
നാളുകളെണ്ണവെ, യാത്ര ചോദിക്കാതെ
നീലവിഹായസ്സില്‍ നീങ്ങുന്നു നീരദം.

തിരികെട്ടൊരോട്ടു നിലവിളക്കും തണ്ടി-
ലിഴയുന്ന ചെമ്പനെറുമ്പിന്റെ കൂട്ടവും
ഇടതിങ്ങി വിങ്ങും നിരാശയും പാഴ്‍ചെളി
ചിടകെട്ടിമൂടും ശവപ്പറമ്പും കണ്ണി-
ലുറയുന്നു, പാമ്പുകള്‍ പിണയുന്നു, കുന്നിന്‍
നിറുകയില്‍ നിന്നവ,യെത്തിനോക്കുന്നെന്റെ
മഞ്ചാടി കൈവിട്ടു പോകുമെന്നോര്‍ത്തു ഞാന്‍
കൈകള്‍ മുറുക്കുന്നു.

4
തീരത്തിലെത്താത്ത കൊച്ചു തിരകളും
തീരാത്തമോഹവും
താളം ചവുട്ടിത്തളര്‍ന്ന പാദങ്ങളും
പാളത്തിലൂടര്‍ദ്ധരാത്രിയിലെത്തുന്ന
വണ്ടിക്കു കാതോര്‍ത്തൊടുങ്ങുന്ന ജീവനും
കള്ളന്റെ കാവലും
ആറ്റിലൊഴുകുന്ന കാട്ടു തടികളും
നീരവമേതോ മരക്കുറ്റിമേലൊരു
ദാരുശില്പം പോലിരിക്കുന്ന പക്ഷിയു-
മൊന്നുചേര്‍ന്നെന്നുടെ മഞ്ചാടി തട്ടുവാന്‍
തക്കവും പാര്‍ത്തങ്ങിരിക്കുന്നുവെങ്കിലും

നാളെ മരിക്കാത്ത കാലം കുലയ്ക്കുന്ന
വില്ലിന്റെ ഞാണൊലി ഞാനായി മാറവെ,

ചാലെ വിടര്‍ന്ന നിന്‍ കണ്‍കളും നെറ്റിയില്‍
‍പാതിവിടര്‍ന്നൊരു ചന്ദനപ്പൊട്ടുമാ-
യെന്റെ കിനാവിലും മായാതെ നില്ക്കുമെ-
ന്നമ്മേ, ശതസഹസ്രാബ്ദമായ് ജനകോടിക-
ളാരതി ചെയ്യുന്ന നിന്റെ പാദത്തിലെന്‍
പൈതൃകമാകുമീ മഞ്ചാടി, യര്‍പ്പിച്ചിടട്ടെ ഞാന്‍.

5
എത്ര,യിറക്കങ്ങ,ളേറ്റങ്ങള്‍ താണ്ടിയെ-
ന്നന്ത്യമാം താവളം കണ്ട സംതൃപ്തിയി-
ലീറന്‍ നിലാവുപോ,ലോര്‍മ്മകള്‍ കൈകളില്‍
‍കോരിയര്‍പ്പിച്ചിടുന്നു ഞാ,നിന്നും
മഹാരുദ്രതാണ്ഡവസ്പന്ദം തുടിക്കുന്ന കോശങ്ങ,-
ളാണ്ടുകള്‍ തിന്നുതീര്‍ത്തിട്ടുമെന്തിനോ
വാപിളര്‍ന്നെത്തുന്നൊരാജന്മതൃഷ്ണകള്‍
‍വാക്കുകള്‍ക്കര്‍ത്ഥമായ് തീരും വികാരങ്ങള്‍
തിക്കും തിരക്കും നിറഞ്ഞുള്ളൊരോട്ടവു,
മൊക്കെയുംബാക്കി നില്ക്കും കടം വീട്ടുവാന്‍...

ആനുകാലികം 5

യുദ്ധക്കൊടുംതീയെരിഞ്ഞെന്റെ.....

2007-09-08T08:19:00.000+05:30

യുദ്ധക്കൊടുംതീയെരിഞ്ഞെന്റെ ജീവനില്‍‍
മുഗ്ദ്ധമോഹങ്ങളൊടുങ്ങീ, വരേണ്യമാ-
മെത്ര സങ്കല്പങ്ങ,ളാശകള്‍, ചിന്തക-
ളെത്രയോ ഭാവങ്ങള്‍ സ്വപ്നലോകങ്ങളും
മണ്ണായി മണ്ണോടു ചേര്‍ന്നു, ലയിക്കുന്നു
കണ്ണിലും കൂരിരു,ളെങ്കിലു,മെന്നുടെ-
യുള്ളിലുണരുന്ന പത്മവ്യൂഹം തകര്‍-
ത്തെന്നും ജയിക്കുന്ന ചൈതന്യകാരിണി,
നീ മായ,യല്ലെന്റെ പ്രാചീനസൌഭഗം
നീയെന്റെ കണ്‍കളില്‍ പൂക്കുന്ന പ്രാഭവം.

ഇന്നിക്കുരുക്ഷേത്രഭൂവില്‍ ശവംതീനി-
യൊന്നിച്ചുകൂടിത്തിമിര്‍ക്കും മുഹൂര്‍ത്തമാ,
യാര്‍ത്തട്ടഹാസം മുഴക്കുന്നു, പേപിടി-
ച്ചാടുന്ന സ്വാര്‍ത്ഥത, കേഴുന്നു ജീവിതം.
’നീയെന്തു നേടി, നിനയ്ക്കാത്ത കീര്‍ത്തിയോ
മായാത്ത ദുഃഖമോ നിത്യ നൈരാശ്യമോ ?’
ചുറ്റും നിരക്കവെ വഞ്ചന,യെന്നുള്ളില്‍
മുറ്റിടും പൌരുഷം വെമ്പിപ്പിടയവെ
നീ വന്നണഞ്ഞാലു,മാത്മസഞ്ജീവനി
നീ വീഴ്ത്തിയാലുമെന്‍ പ്രാണതന്തുക്കളില്‍.

ആനുകാലികം 6

പരമേശ്വരനുടെ മിഴിയില്‍ നിന്നും...

2007-09-07T20:25:00.000+05:30

പരമേശ്വരനുടെ മിഴിയില്‍ നിന്നും
തീപ്പൊരി ചിന്നുന്നൊരു തരി,
ചിന്തയിലാളിപ്പടരുന്നനനവധി-
കൈകളിലെരിയും തീപ്പന്തങ്ങള്‍ നിറച്ചൂ
പടനിലമാകെ വെളിച്ചം
താണ്ഡവനടനവിലാസം
ചിന്തകളങ്ങനെ,യിടതടവില്ലാതൊഴുകി-
യെതിര്‍പ്പിന്നടരുകളൊക്കെ-
യടര്‍ന്നകലുന്നൂ.

ഡമരു മുഴങ്ങുന്നുതിരുമുണര്‍വ്വി‍-
ന്നാദിമയക്ഷര,മമരസ്പന്ദനമറിയും
കവിഗണ,മവരുടെ കവിതയി-
ലമലം പകരുന്നേകാത്മതയുടെ
തെളി നീരുറവകള്‍, ഗംഗകളൊഴുകു-
ന്നവയില്‍ മുങ്ങി നിവര്‍ന്നെഴുന്നേല്ക്കും
നവയുഗധര്‍മ്മഭടന്മാ-
രവിരത,മവനിയി,ലനുപമ ദൌത്യവുമായി-
ന്നവധികളില്ലാ കര്‍മ്മ പഥത്തില്‍
പടനിലമാകെ വെളിച്ചം
താണ്ഡവനടനവിലാസം
ചിന്തകളങ്ങനെ,യിടതടവില്ലാതൊഴുകി-
യെതിര്‍പ്പിന്നടരുകളൊക്കെ-
യടര്‍ന്നകലുന്നൂ.

ആനുകാലികം 7

എനിക്കറിയില്ല...

2007-09-05T22:31:00.000+05:30

മൗനമൊരുക്കും മാറാപ്പില്‍ വ്യഥ
മുഖവും പൂഴ്തിയിരിക്കുന്നൂ
നെറ്റിയിലമരും വിരലുകളനവധി
ചിന്തകള്‍ താങ്ങി നിറുത്തുന്നൂ
ഒരു വിരല്‍ കണ്ണിലുമാഴ്തുന്നൂ
പുരികം തെല്ലു ചുളിക്കുന്നൂ
വിരലുകള്‍ ചൂണ്ടുവതാ,രാരോയെന്
‍കരളില്‍ മുള്ളുകളാഴ്തുന്നൂ
"എനിക്കറിയില്ലാ", നീ പണ്ടേ പോലൊരു
പൊയ്മുഖമണിയുന്നൂ
പൊരുളുകളറിയുക,യരുളുക-
യെന്തൊരു വേദനയാണെന്നോ.

ഒരു ചെവി മറു ചെവി കേറിയിറങ്ങി-
പ്പോവതു നേരം പോക്കെന്നോ
വെറുതെ കാടും കടലും കാറ്റും
മലരിന്നഴകു നിറയ്ക്കുന്നൂ
ചൊടികള്‍ ചെറ്റു വിടര്‍ത്താതങ്ങനെ
കവിളുകള്‍ മിഴികള്‍ ചിരിക്കുന്നൂ
കണ്ണുകള്‍ സ്നേഹം ചൊരിയുമ്പോ-
ളെങ്ങാണ്ടൊരു കിളി പാടുന്നൂ
കണ്ടവ,കേട്ടവ സത്യ,മതുത്തര-
മേന്തും പല്ലി ചിലയ്ക്കുന്നൂ
"എനിക്കറിയില്ലാ", നീ പണ്ടേ പോലൊരു
പൊയ്മുഖമണിയുന്നൂ

കടന്നു വന്നൂ ഫലിതം ജീവിത-
ദ്വയാര്‍ത്ഥ സംഹിതകള്
‍അവയുടെ പുറകില്‍ നിന്നും തുരുതുരെ
ശരങ്ങള്‍ പെയ്യുന്നൂ
വരബല,മയനം കാത്തീടാന്‍ ശര-
ശയ്യയൊരുക്കുന്നൂ
അസ്ത്ര,മൊരെണ്ണം കൂടി ക്ഷമയുടെ
മാറു പിളര്‍ക്കുന്നൂ
അക്ഷമ തിങ്ങി നിറഞ്ഞൊഴുകുന്നൂ
ദാഹവുമേറുന്നൂ
വീണ്ടും മിഴികള്‍ തുറക്കെ, മുന്നില്‍
ശൂന്യത പൂക്കുന്നൂ
"എനിക്കറിയില്ലാ", നീ പണ്ടേ പോലൊരു
പൊയ്മുഖമണിയുന്നൂ

18-03-1990

കോലക്കുഴല്‍വിളി

2007-09-05T19:41:00.000+05:30

1
പൊട്ടിച്ചിരിച്ചു കുളിര്‍മ്മയേകുന്നൊരി-
ക്കെട്ടിമറിയു,മൊഴുക്കില്‍
തൂവും വിഷത്താലെ,യെല്ലാം നശിപ്പിച്ചു
നാടിതു നാരകമാക്കി
ഏവര്‍ക്കും കണ്ണുകള്‍ക്കിമ്പമായ് മേവിടും
കാനന ഭംഗികളാകെ
ക്രൂരനാ,മിന്നേതോ കാളിയന്‍ ചിന്തുന്ന
പാരദ,മേല്ക്കെ,യുണങ്ങി

2
അന്നൊരു നാളിലാ,ക്കണ്ണനും കൂട്ടരും
കാലിയെ മേയ്ക്കാനിറങ്ങി
കാട്ടിലെ വന്മരക്കൂട്ടങ്ങ്ളേകിടും
ഛായയില്‍ കേളികളാടി
കാളിന്ദീ തീരത്തിലെത്തിയ കൂട്ടുകാ-
രാര്‍ത്തിയാല്‍ വെള്ളം കുടിച്ചു.
തോഴരെ ഗോക്കളെ,യൊട്ടേറെ നേരമായ്
കാണാതെ കണ്ണന്‍ കുഴഞ്ഞു
ആഹ്വാനമൊന്നിനും കാത്തു നില്ക്കാതവന്‍
കാളിന്ദീ തീരത്തിലെത്തി
മാനസം നിശ്ചലമാക്കിയിട്ടൊന്നവന്‍
കാളിയ സര്‍പ്പത്തെ നോക്കി

3
മിന്നലിന്‍ വേഗമോടാവന്‍ഫണങ്ങളില്‍
നിന്നവന്‍ പാദം പതിച്ചും
പാദ,മിളക്കി,ച്ചവിട്ടിയും ചാടിയും
കാളിയമര്‍ദ്ദനമാടി
തുള്ളിക്കളിച്ചോരു കണ്ണന്റെ മേനിയില്‍
വിണ്ണിലെത്താരകള്‍ മിന്നി
ആരണ്യഗര്‍ഭഗൃഹങ്ങളില്‍ കണ്ണന്റെ
കോലക്കുഴല്‍ വിളി തങ്ങി

ഗോപാലബാലകര്‍ നമ്മളുണരേണ്ട
നേരമാ,യൊന്നെഴുന്നേല്ക്കൂ……

http://rajichandrasekhar.wordpress.com/2007/09/03/à´àµà´²à´àµà´àµà´´à´²àµâ-à´µà´¿à´³à´¿/

അധിനിവേശം

2007-09-04T16:19:00.000+05:30

ഉരുള്‍‌പൊട്ടിവീണു നിന്നധിനിവേശം
ഒരുപിടിച്ചാരത്തിലൊരു ജീവതാളം

പ്രതിരോധരോഷം കനക്കും വിധേയത്വം
അവസാനതുള്ളിയും ചോര്‍ന്നു പോകും വരെ

കെണിയിലകപ്പെട്ടതാര്‍
വലനെയ്തതാര്‍
നീ... ഞാന്‍....
ഇലയനക്കത്തില്‍ ഇമയനക്കത്തില്‍
മയങുന്ന കാഴ്ചകള്‍..
വാക്കുകള്‍, ഇമ്പം, കമ്പം,
കണിക്കാഴ്ചകള്‍, ഇണക്കം, പിണക്കം..

വിത....
മുളയ്ക്കാത്ത പാടം
വിയര്‍പ്പിറ്റുവീഴും തളര്‍കാലശേഷം വിശേഷം.

കവി വിതയ്ക്കുന്നതര്‍ഥ ജ്വാലാമുഖി
കള മുളയ്ക്കു,ന്നനര്‍ഥക്കുരുക്കുകള്‍

21-10-2006

നിന്നെ,യെന്നെ മറന്നു സ്നേഹിപ്പു ഞാന്‍

2007-09-03T20:39:00.000+05:30

എന്നുമിങ്ങനെ,യോതിടാ,മെന്‍സഖീ
-"നിന്നെ,യെന്നെ മറന്നു സ്നേഹിപ്പു ഞാന്‍"

തടികളോരോന്നു കൊത്തി മരംകൊത്തി
ചടുലമേകുന്ന താളക്കൊഴുപ്പിലും
ചെറിയ മാവിന്റെ കൊമ്പിലൂടെപ്പൊഴും
തെരുതെരെച്ചാടു,മണ്ണാന്റെ പാട്ടിലും
ഇലകള്‍ മന്ദമായോതും കഥയിലും
അലയടിക്കുന്നതെന്‍ സ്നേഹഗിതികള്‍
-അലകടല്‍ പോലെ സ്നേഹിപ്പു നിന്നെ ഞാന്

‍കാലമേറെക്കടന്നിട്ടു,മെന്തിനോ
കാവല്‍ നില്‍ക്കുന്നൊരാല്‍മരച്ചില്ലകള്‍
നീരൊഴുക്കിലെ നക്ഷത്രമേളങ്ങള്
‍നീലമേലാപ്പില്‍ മത്സ്യക്കുരുന്നുകള്
‍മേഘമാലക,ളാര്‍ദ്രസംഗീതമായ്‌
പൂനിലാവല, മഞ്ഞിന്‍ കുളിര്‍മ്മകള്‍
‍പൊങ്ങി വിണ്ണോളമെത്തുന്ന പൂമണം
ഒക്കെയും നിനക്കെന്നുടെ വാക്കുമാ-
യെത്തിടും സ്നേഹ സന്ദേശവാഹകര്‍
-കുത്തൊഴുക്കുപോല്‍ സ്നേഹിപ്പു നിന്നെ ഞാന്‍.

ഇളകിയാടുന്നൊരില്ലി,യതിന്‍ താഴ-
ത്തളക,മൊട്ടൊട്ടൊതുക്കി വെണ്‍താരുപോല്‍
മിഴികള്‍ പുസ്തകത്താളിലുറപ്പിച്ചും
അഴികള്‍ ഭേദിച്ചു പാറിയും തെല്ലിട
അതി വിദൂരത്തിലാരിലോ തങ്ങിയും
അതിരു താണ്ടാതിടഞ്ഞു പിന്‍വാങ്ങിയും
ചൊടിയിലാരക്തസ്വപ്നങ്ങള്‍ പുവിടും
തൊടിയിലും നെല്‍പാട വരമ്പിലും
തുടരെ രാഗവിരാഗ മാര്‍ഗ്ഗങ്ങളില്‍
‍അടിപതറുന്ന ഭ്രാന്തന്‍ കവിയിലും
മന,മുടക്കി മടങ്ങിയു,മക്ഷര-
വന രഹസ്യ,മുരുവിട്ടിരിക്കും നിന്‍
അരികിലിക്കിളിയാക്കുന്ന പൂവുകള്
‍അരികളല്ലെന്റെ സ്നേഹമാണോമലേ
അവ,യരുളുന്നതെന്റെ സ്നേഹോക്തികള്‍
-കവിയു,മാറുപോല്‍ സ്നേഹിപ്പു നിന്നെ ഞാന്‍..

വളവുക,ളേറേ,യേറ്റ,മിറക്കവും
വളരു,മാത്മവിഷാദ,മാഘാതവും
അടിമുടിയേറ്റുലഞ്ഞോരു ജീവിതം
പിടിവഴുതുന്നു നിന്നടുത്തെത്തുവാന്‍
"വെറുതെയാണൊക്കെ"-യെന്നു നിന്‍ വാക്കുകള്‍
നിറയു,മുള്ളില്‍ നിന്നിത്രമാത്രം സഖീ
-നിന്നെ,യന്ധമാ,യത്രയ്ക്കഗാധമാ-
യെന്നു,മെന്നെ മറന്നു സ്നേഹിപ്പു ഞാന്‍..

കവിയു,മാറുപോല്‍ കുത്തൊഴുക്കെന്നപോല്‍
കരകള്‍ കാണാക്കടലിരമ്പുന്നപോല്‍
കവിമനസ്സിന്റെ,യന്തസ്ഥലികളില്‍
കവിതയൂറുന്നു- നിന്നെ സ്നേഹിപ്പു ഞാന്‍

3-11-1991

ആയിരത്തിയെട്ടു കമന്റുകള്‍

2007-09-03T20:25:00.000+05:30

ഞാന്‍ ചോദിക്കുന്നതുകൊണ്ട് നിങ്ങള്‍ തരുമെന്നെനിക്കറിയാം.

ഇതൊരു ഗൌരവമുള്ള പോസ്റ്റാണ്. :)

കവിതയ്ക്കു കമന്റിടാന്‍ പ്രയാസമാണ്. എനിക്കാണെങ്കില്‍ രസകരമായി ഗദ്യമെഴുതാനുമറിയില്ല.

ചെറുപ്പം മുതലേയുള്ള മസില്‍ പിടുത്തം തമാശയ്ക്കു വഴി മാറുന്നുമില്ല. ബ്ലോഗുകള്‍ വായിക്കാന്‍ തൂടങ്ങിയതിനുശേഷം അല്പസ്വല്പം വ്യത്യാസങ്ങള്‍ കണ്ടു തുടങ്ങിയിട്ടുണ്ട്.

അതുകൊണ്ടു മാത്രം ഇതൊരു ഗൌരവമുള്ള പോസ്റ്റാകണമെന്നില്ല.

ഇത് ഗൌരവമുള്ള പോസ്റ്റാകുവാന്‍ ആതിരത്തിയെട്ടു കമന്റുകള്‍ വേണം.
ഐശ്വര്യമുള്ള ആരെങ്കിലും ഒരാള്‍ തുടങ്ങിയാട്ടെ, ആയിരത്തിഏഴെണ്ണം പുറകെ വരും.

എങ്ങനെയാണു കമന്റുകള്‍ക്കു നമ്പറിടുന്നത് ..?
recent comments എങ്ങനെ പ്രദര്‍ശിപ്പിക്കാം ?
കമന്റുകളുടെ എണ്ണം കൂട്ടാനുള്ള എളുപ്പവഴികള്‍ എന്തൊക്കെയാണ് ?

ബെര്‍ളിത്തരങ്ങള്‍ക്ക് മറുമൊഴിയെന്തിന്......?

2007-09-03T19:40:00.000+05:30

ബെര്‍ളി മറുമൊഴിയില്‍ നിന്ന് പുറത്തേക്ക് പോകുന്നത് കണ്ടു. അത് വാര്‍ത്തയായതും ചര്‍ച്ചയായതും ശ്രദ്ധിക്കപ്പെടേണ്ടതു തന്നെ, തര്‍ക്കമില്ല.

രഹസ്യലോകത്തില്‍, പണ്ട് comment notification പിന്മൊഴികളും ഈ അടുത്തകാലത്ത് മറുമൊഴികളും ആക്കിയിട്ടുണ്ട്. പക്ഷെ അവ ഞാനുപയോഗിച്ചു നോക്കിയിട്ടില്ല. അറിവില്ലായ്മ തന്നെ കാരണം.

അതുകൊണ്ട് ബെര്‍ളി മറുമൊഴിയില്‍ ഉള്ളതും ഇല്ലാത്തതും എനിക്ക് ഒരു പോലെയാണ്.

താങ്കളുടെ ബ്ലോഗ് നിലനില്ക്കണം.

ബെര്‍ളിയുടെ ശൈലിയില്‍ സ്വാഭാവികമായി മാറ്റങ്ങള്‍ വരുന്നെങ്കില്‍ വരട്ടെ. ബലം പിടിച്ച് ശൈലി മാറ്റണ്ട.

വായിക്കാന്‍ താത്പര്യമുള്ളവര്‍ ലിങ്ക് കൊടുത്തിട്ടുണ്ടാകുമല്ലൊ. അങ്ങനെ കൊടുക്കുന്നത് മറ്റുള്ളവര്‍ക്കു കൂടി പ്രയോജനപ്പെടും.

ഇരുള്‍ മൌനത്തിലേക്കൊഴുക്കിയത്...

2007-09-02T14:40:00.001+05:30

നീ......
ഇരുള്‍ മൌനത്തിലേക്കൊഴുക്കിയത്...

ഹരിതമേലാപ്പു വല്‍മീകമാക്കി ജ്വലിക്കുന്ന നഗ്നത,

പൃഥുല ധവളകാന്തിയില്‍ ചുട്ടുപൊള്ളും തണുപ്പിന്‍ കനല്‍ക്കട്ട,

ഓര്‍മ്മയുടെ നനുത്ത മേഘങ്ങള്‍ അരിച്ചിറങ്ങുന്ന താഴ്വര,

മൃദുഭാവലോലാംഗ ഗോളാന്തരങള്‍,

മാതൃത്വത്തിന്റെ മരുപ്പച്ച,

മുഖത്തുരുമ്മുന്ന മുള്ളുകള്‍,

തീര്‍ഥം തുളുമ്പുന്നൊരുള്‍ക്കണ്ണ്,

തെന്നിനീങ്ങും ശില,

വഴുതും കന്നക്കുകള്‍.

നീ....

സ്വപ്നങ്ങളുടെ ഭ്രമണ പഥത്തില്‍ എപ്പോഴാണ് വന്നു നിറഞ്ഞത്.

നിന്റെ

വിരലുകള്‍ മീട്ടിയത്

ഉണര്‍വിന്റെ നനുത്ത തന്ത്രികള്‍

ചുണ്ടുകള്‍ അലിയിച്ചെടുത്തത്

ആവേഗത്തിന്റെ ജാഡ്യനിലകള്‍

രസനയുടെ രാസവിദ്യയില്‍ അലിവിന്റെ മഹാസമുദ്രം

പൂതനയുടെ മുലക്കണ്ണിലുടെ

ഭൂമിതിളയ്ക്കുന്ന ലാവ വലിച്ചെടുത്ത്

സ്നേഹത്തിന്റെ നീരുറവയായ് പുനര്‍ജ്ജനിക്കുന്നു

നീ....

10-11-2006

കടല്പാലം

2007-09-01T15:54:00.000+05:30

വലതു കൈയ്യില്‍ പുകയും തൂലിക,
ഇലച്ചീന്തില്‍ ഹൃദയരക്തം,
കലഹത്തിന്റെ, കദനത്തിന്റെ,
കരുണയുടെ കഥ കുറിക്കുവാന്‍
കവിതകളാക്കി,ക്കുരുതിയാടുവാന്‍.

കടലിനുള്ളിലേയ്ക്കൊരു പാലം
ഇടുങ്ങിയ വഴി
ഒരാള്‍ക്കു മാത്രമായ്
ഒതുങ്ങും വാതിലും.

ഇരകൊളുത്തിയ ചരടിലക്ഷമം
ഇമ ചിമ്മും മിഴി
ഫലിതത്തിന്‍
തീക്ഷ്ണമുനയെഴും ഗന്ധം.

ചടഞ്ഞിരിക്കുന്ന യുവാവിന്‍ ചിത്രങ്ങള്‍
വരഞ്ഞെടുത്തിടും തരുണ കൌതുകം.
കടലിന്‍ മാറില്‍,
നിന്നുലയും ബോട്ടുകള്‍.

പടങ്ങള്‍ കാണുവാന്‍
കുരുന്നു കണ്ണുകള്‍
അരികിലച്ഛനും
വിരല്‍ സ്നേഹത്തിന്റെ പിടിക്കു,മമ്മയും.

എന്തിനിങ്ങനെ....?

2007-08-31T13:10:00.000+05:30

എന്തിനിങ്ങനെ നിന്റെ ചുറ്റിലു-

മെന്നെ നീറ്റിടു,മോര്‍മ്മപോ-

ലന്തിയോളവു,മാര്‍ത്തലയ്ക്കണ-

മെന്നു ചിന്തകള്‍ ചോദ്യമായ്

പന്തിയല്ലിതു നിര്‍ത്തി, നിന്നുടെ

വാഴ്വിനെ,ക്കരകേറ്റുകെ-

ന്നന്തിയെത്തി, വിതുമ്പിടുന്നിനി,

മെല്ലെ ഞാന്‍ വിടവാങ്ങിടാം.

ഉള്ളം വറ്റി വരണ്ടതല്ല...

2007-08-27T12:47:00.000+05:30

ഉള്ളം വറ്റി വരണ്ടതല്ല, കിണറി-

ന്നാഴത്തിലുണ്ടെപ്പൊഴും

വെള്ളം, കോരിയെടുക്കുവാ,നണയുവോര്‍-

‍ക്കെന്നും മൃദുസ്സാന്ത്വനം,

പൊള്ളും ഹൃത്തിനു,മാത്മശാന്തി പകരും

ജീവാമൃതം, നിത്യവും

നുള്ളും കൈകളിലുമ്മവയ്ക്കു,മലരാം

പൂപ്പുഞ്ചിരിത്തേന്‍കുടം.

വന്നെത്താനിനിയെന്തമാന്തം...

2007-08-27T12:22:00.000+05:30

വന്നെത്താ,നിനി,യെന്തമാന്ത,മിരുളില്‍-

ത്തപ്പിത്തടഞ്ഞീടുവോ-

നെന്നെത്തേടി നിതാന്ത വര്‍ണ്ണലയമേ

നീയെന്നു ചിന്തിച്ചു ഞാന്‍.

പിന്നെത്തോന്നി,യിതെന്തു ചിന്ത,യകമേ

നിന്മൌനമന്ത്രം നിറ-

ഞ്ഞെന്നെത്തന്നെ യുഗാന്ത,മോള,മലിവാം

നിന്നില്‍ ലയിപ്പിക്കവേ.

സന്ധ്യ ; ശംഖുംമുഖത്ത്

2007-08-26T10:47:00.000+05:30

തിരകള്‍ പൊങ്ങിത്തിരയുന്നൂ;

നിന്‍ രൂപം

ദൂരെപ്പാതയിലൂടിങ്ങണയുന്നോ ?!

മയിലാടുന്നോ !

മൃദുപദപതനത്തില്‍

ക്ഷമ പൂക്കുന്നോ !

കഴലിണ തഴുകാന്‍,

വെള്ളിക്കൊലുസ്സുക-

ളന്‍പൊടു ചാര്‍ത്തിക്കാന്‍ കൊതി,

ഉള്ളില്‍ ചൂണ്ടകോളുത്തി വലിക്കും വേദന.

പിടയും മീനിനു മോചനമെന്നോ ?

സ്വര്‍ണ്ണക്കിന്നരി ചാര്‍ത്തി-

ക്കരിമുകിലങ്ങനെ മന്ദം മന്ദ,മടുക്കെ,

കതിരവ,നെന്നുടെ സ്വപ്നം,

കാഴ്ചത്തിരകള്‍

തേങ്ങിത്തേങ്ങി മടങ്ങി.

ഒരു തരി വെട്ടം ബാക്കി,

പൊന്‍പ്രഭയാകെ മറഞ്ഞി-

ന്നുഡുനിര മാത്രം മാന-

ത്തവരുടെ കണ്ണില്‍ ശോകത്തിരികളു-

മെരിയുന്നുണ്ടവിരാമം.

മാപ്പ്

2007-08-25T01:09:00.000+05:30

വെറും വാക്കു നിന്നിളം ചിത്തം മുറിച്ചുവോ
നറും പൂക്കളില്‍ തന്‍ നഖപ്പാടു ചേര്‍ത്തുവൊ

വേദന പോക്കുവാനാളല്ല,യെങ്കിലും
"വേദനിക്കുന്നു ഞാന്‍ " മാപ്പു നീയേകുക

തിരകള്‍

2007-08-23T23:37:00.000+05:30

പൊങ്ങിപ്പൊങ്ങി,യൊരല്പ നേര,മുയരം
തോന്നിച്ചു താഴെപ്പതി-
ഞ്ഞങ്ങിങ്ങാത്മ വിഷാദ,മാര്‍ന്നു മരുവും
കല്ലിന്‍ കരിംകോട്ടയില്‍
തിങ്ങിക്കേറിടു,മാര്‍ത്തലയ്ക്കു,മുടനെ
പിന്‍വാങ്ങി വീണ്ടും വരും
നിങ്ങള്‍, പുഞ്ചിരി തൂകിടും തിരകളോ
തീരാത്ത മോഹങ്ങളോ..?!

മുടിയിലോ വെണ്മുകില്‍പ്പൂവു ചൂടി

2007-08-22T21:48:00.000+05:30

മലമുകളിലുണ്ടൊരു ചിരിയുടെ

മലരണിമുകിലുരുമ്മി നില്ക്കുന്നു

രക്തസാക്ഷി

2007-08-22T18:34:00.000+05:30

ഞങ്ങള്‍
ഇടം വലം നിശ്ചയിക്കുന്നവര്‍
ഇടത്തോട്ടു നോക്കുവോര്‍,
പുരോഗമന പരീശന്മാര്‍,
മതേതരത്വത്തിന്റെ അപ്പോസ്തലന്മാര്‍.

ഞങ്ങള്‍ തൊട്ടാല്‍
എന്തും പുരോഗമനം
അഴിമതി വിമുക്തം
എഴുതിയാലോ ഭാഷയുടെ അപനിര്‍മ്മാണവും.

അതു മാത്രം വായിക്കുക,
ചര്‍ച്ച ചെയ്യുക,
പ്രചരിപ്പിക്കുക.
ഇടതോരം ചേര്‍ന്നേ പോകുക.

നിങ്ങള്‍ വലത്തോട്ടടുക്കുകയും
വലത്തോട്ട് നോക്കുകയും ചെയ്യുന്നവര്‍,
വര്‍ഗ്ഗീയ വളമൂറ്റുവോര്‍, ‍
വിഷമേറ്റുവോര്‍‍,
പ്രതിലോമകശ്മലര്‍.

നിങ്ങളെ,
വായിക്കരുത്,
കേള്‍ക്കരുത്,
ചര്‍ച്ചിക്കരുത്-
എന്ന് പ്രത്യയശാസ്ത്രം.
വെറുക്കുക, ഒറ്റപ്പെടുത്തുക-
എന്ന് പ്രവര്‍ത്തന തന്ത്രം.

’അവന്‍’
ചിന്തയില്‍ സ്വാതന്ത്ര്യം കാണുന്നവന്‍
അല നിറയു,മാത്മാവിനരിയ സ്വാതന്ത്ര്യമാ-
യണുതോറുമെന്നും പുനര്‍ജ്ജനിപ്പോന്‍.
ആശയങ്ങള്‍ക്കുമേല്‍ സ്വത്വം മറയ്ക്കുവാന്‍
ഇടതെന്നു, വലതെന്നു വേഷമാടാത്തവന്‍.

നിറമുള്ള കണ്ണടച്ചില്ലുകള്‍ക്കപ്പുറം
നേരു കാണുന്നവന്‍
നേരെ നോക്കുന്നവന്‍.

നവനരനു സഞ്ചാര പാത തീര്‍ക്കുന്നവന്‍
കാഴ്ചയുടെ മുന കൂര്‍ത്ത മുള്ളിനാ-
ലാള്‍വലകള്‍ വീശുവോന്‍
ആളെപ്പിടിക്കുവോന്‍.

വരിക,
കൈ കോര്‍ത്തിടാം
ഞങ്ങളും
നിങ്ങളും
കാല്‍വരിക്കുന്നിലേയ്ക്കവനെ നയിച്ചിടാം.

അവനെ,യതിവേഗ-
മാക്കുരുശ്ശിലൊന്നേറ്റിടാ-
മവസാന,മിങ്ങനെ കൈ കഴുകാം.
നിങ്ങളാണവനെയും കൊന്നവര്‍, നിന്ദിതര്‍,
ഞങ്ങള്‍, ‍ക്കിതിലൊരു പങ്കുമില്ല.

അവനാണു ഞങ്ങള്‍തന്നരുമക്കിടാവിനി-
ക്കവലയ്ക്കു കാവലാം രക്തസാക്ഷി.

“അടുത്തു കാണുന്നതെല്ലാം അസ്സലാവണമെന്നില്ല”

2007-08-21T22:39:00.000+05:30

“അടുത്തു കാണുന്നതെല്ലാം അസ്സലാവണമെന്നില്ല”

അവനവന്റെ ആസനം നനയാതെ നോക്കുന്നവരുടെ (അതോ നനയ്ക്കാതെയോ..!) കാലഘട്ടത്തിലും സമകാലിക സംഭവവികാസങ്ങളെ പ്രതീകങ്ങളിലൂടെ രൂക്ഷമായി ദൃശ്യവല്ക്കരിക്കാനുള്ള കഴിവ് ഒരു ജീനിയസ്സിന്റെ ലക്ഷണമാണ്.

’ലക്ഷം കവികള്‍ ചേരുമ്പോളതില്‍
ലക്ഷണമൊത്തവരൊന്നോ രണ്ടോ’

എന്ന് നമ്പ്യാര്‍ കവിതയ്ക്കൊരു പാഠാന്തരം നല്കിയാലും തെറ്റുണ്ടാകുമെന്നു തോന്നുന്നില്ല. കാരണം അങ്ങനെ ലക്ഷണമൊത്ത ഏതാനും കവികളെ ബ്ലോഗു വായനക്കിടയില്‍ എനിക്കു പരിചയപ്പെടാനിടയായിട്ടുണ്ട്.

ദുരിതാനുഭവങ്ങളുടെ തടവറയില്‍ നിന്ന് സഹജീവികളുടെ പ്രാര്‍ത്ഥനയും സ്നേഹവും രക്ഷപ്പെടുത്തിക്കൊണ്ടുവന്ന ശക്തവും വ്യക്തവുമായ രാഷ്ട്രീയബോധത്തിന്റെ കരുത്ത്, കാവ്യവിഹായസ്സിലൂടെ ചിറകടിച്ചുയരുമ്പോള്‍ കാണുന്ന കാഴ്ചകള്‍ യഥാതഥം ആവിഷ്ക്കരിക്കപ്പെടുകയാണ് ഡെപ്യൂട്ടേഷന്‍ എന്ന കവിതയില്‍.

ഇങ്ങനെയാണ് കവിത തുടങ്ങുന്നത്-
“ഉത്തല ലെന്‍സിന്റെ കനത്തില്‍
അടുത്തു കാണുന്നവയെല്ലാം
അസ്സലാവണമെന്നില്ല.”‍
കവിതയുടെ ഗതിയെ സമയാസമയങ്ങളില്‍ നിയന്ത്രിക്കുന്നത് ഈ വരികളാണ്.

മധുരമനോജ്ഞമായ പൊന്നരിവാള്‍ കനവുകളും തമസ്ക്കരിക്കപ്പെട്ട പാരമ്പര്യങ്ങളില്‍ നിന്നും ഉയിര്‍ത്തെഴുന്നേല്ക്കുന്ന രാഷ്ത്രസങ്കല്പവും മാനവജീവിതമാകുന്ന നരകമരുഭൂമികളില്‍ നിന്നും സ്വര്‍ഗ്ഗീയവിശുദ്ധികളിലേയ്ക്കുള്ള പ്രബോധനത്തിന്റെ ഹരിതമോഹങ്ങളും ഇടയലേഖനങ്ങളാല്‍ നയിക്കപ്പെടുന്ന കുഞ്ഞാടുകളുടെ വാഗ്ദത്തഭൂമിയിലേയ്ക്കുള്ള പ്രയാണദാഹങ്ങളുമൊക്കെയുണര്‍ത്തുന്ന ഒരുതരം അയഥാര്‍ത്ഥ യാഥാര്‍ത്ഥ്യബോധമുണ്ടല്ലൊ, അതിന്റെ കട്ടിക്കണ്ണടച്ചില്ലിലൂടെ മാത്രം കാര്യങ്ങളെ നോക്കിക്കാണുന്നതുകൊണ്ടാണ് ഇന്നത്തെ സാമൂഹികാന്തരീക്ഷത്തില്‍ ധാര്‍ഷ്ത്യത്തിന്റെ പോര്‍വിളികളും പൊട്ടിത്തെറികളും ചോരച്ചുഴികളുമൊക്കെ ഇടയ്ക്കിടെ ഉയരുന്നത്.

ഈ കട്ടിക്കണ്ണടയിലൂടെയുള്ള കാഴ്ചയും തത്ഫലമായുണ്ടാകുന്ന വീക്ഷണ വൈകല്യവും സമൂഹത്തിന്റെ സമസ്തമേഖലകളിലും വ്യാപിച്ചുകൊണ്ടിരിക്കുമ്പോള്‍, അതൊരു ദുരന്താണുവിസ്ഫോടനമായി മാറാതിരിക്കുവാനാണ് കവി നമ്മെ ഓര്‍മ്മിപ്പിക്കുന്നത്–

“ഉത്തല ലെന്‍സിന്റെ കനത്തില്‍
അടുത്തു കാണുന്നവയെല്ലാം
അസ്സലാവണമെന്നില്ല.”‍

ഔദ്യോഗിക ജീവിതം 15 വര്‍ഷം പൂര്‍ത്തിയാക്കിയിരിക്കുന്നു

2007-08-20T22:12:00.000+05:30

ഇന്ന് ആഗസ്റ്റ് 20,

എന്റെ ഔദ്യോഗിക ജീവിതം 15 വര്‍ഷം പൂര്‍ത്തിയാക്കിയിരിക്കുന്നു.

ആ സുദിനം, എല്ലാ ബ്ലോഗ് കുടുംബാംഗങ്ങളുമായും പങ്കുവയ്ക്കുകയാണ്,

ബൂലോഗം എന്റെ കുടുംബമായ് മാറുന്നു.

2007-08-19T22:39:00.000+05:30

ഞാന്‍ ബ്ലോഗിലെത്തിയിട്ട് അധികം നാളുകളായില്ല. എന്നാലും ബൂലോഗം എന്റെ കുടുംബവും ബ്ലോഗര്‍മാര്‍ എന്റെ കുടുംബാംഗങ്ങളും ആയി മാറുന്ന അത്ഭുതപ്രതിഭാസം ആശ്ചര്യത്തോടെയാണ് ഞാന്‍ നിരീക്ഷിക്കുകയും അനുഭവിക്കുകയും ചെയ്തുകൊണ്ടിരിക്കുന്നത്.

കോട്ടയത്തുകാരനായ ഒരാള്‍ തിരുവനന്തപുരത്ത് വെട്ടുറോഡില്‍ താമസിക്കുകയും ആറ്റിങ്ങലിനടുത്ത് ഒരു സ്കൂളില്‍ ജോലി നോക്കുകയും ചെയ്യുമ്പോള്‍ തന്നെ, ലോകത്തിന്റെ വിവിധഭാഗങ്ങളിലുള്ളവരുമായി ആത്മബന്ധം പുലര്‍ത്തുകയും അവരുടെ കാര്യങ്ങളില്‍ ഇടപെടുകയും സഹകരിക്കുകയും ചെയ്യുന്നു.

ഇന്നു ‍ഞാന്‍ മുന്‍ പരിചയമൊന്നുമില്ലായിരുന്ന ഒരാളുടെ വീട്ടില്‍ പോയിരുന്നു. അദ്ദേഹം ഡാഫഡില്‍ അംഗമാണ്. (ഷിബു, സജീവ് എടത്താടന്റെ പുസ്തകപ്രകാശനത്തിനുണ്ടായിരുന്നു. എനിക്ക് വിശാലമനസ്കനെയും കൊടകര പുരാണത്തെയുമല്ലെ അറിയാവൂ, എടത്താടനെ അറിയില്ലായിരുന്നല്ലൊ. സംസാരത്തിനിടയിലാണ് എടത്താടന്‍-വിശാലമനസ്കന്‍ ബന്ധം മനസ്സിലായത്.)

നാളെയാണ് ഷിബുവിന്റെ വിവാഹം. സ്കൂളില്‍ പരീക്ഷയായതുകൊണ്ട് നാളെ പോകാനൊക്കുമോയെന്നറിയില്ല. അതുകൊണ്ടാണ് ഇന്നുതന്നെ ഞങ്ങള്‍ നാലുപേരും കൂടി പോയത്.

കുറെ ദൂരമുണ്ടായിരുന്നു, എന്തായിരിക്കും ഷിബുവിന്റെ പ്രതികരണമെന്ന ആശങ്കയും. പക്ഷെ ചിരപരിചിതനെപ്പോലെയാണ് ഷിബു സ്വീകരിച്ചത്. ആരിഫ്, നേരത്തെ അറിയിച്ചിരുന്നു.

ഞങ്ങളുടെ തനി നാടന്‍ മട്ടു കണ്ടിട്ടും വീട്ടുകാരൊന്നു തെറ്റിദ്ധരിച്ചോന്നു സംശയം.

രാത്രി വളരെ വൈകിച്ചെന്നെങ്കിലും വളരെ സ്നേഹത്തോടെ അടുത്തിരുന്ന് ഏറെ നേരം സംസാരിച്ചിട്ടാണ് ഷിബുവിന്റെ അച്ഛനുമമ്മയും സഹോദരിയും അളിയനും ഞങ്ങളെ യാത്രയാക്കിയത്.

സുശീലന്‍ (ഷിബുവിന്റെ അയല്ക്കാരനും ബന്ധുവും) വഴി ചോദിക്കാന്‍ കടയില്‍ക്കയറിയ ഞങ്ങളെ, കൃത്യമായി വീട്ടില്‍ കൊണ്ടെത്തിച്ച സുശീലന്‍.

ഭൌമതാപങ്ങള്‍

2007-08-18T19:43:00.000+05:30

കടപ്പാട്: "ദ്രൌപതി വര്‍മ്മ"യുടെ "റിഹേഴ്സല്‍".
കഥാപാത്രങ്ങളെ ഭൂമിയും സൂര്യനുമാക്കിയുള്ള ഒരു വേറെഴുത്ത്. മൂല കവിതയുമായി നേരിട്ടു ബന്ധമുള്ള വരികള്‍ പച്ച നിറത്തില്‍ കൊടുത്തിരിക്കുന്നു. ബാക്കി എല്ലാ വരികളും എന്റെ; സ്വന്തം ശൈലിയില്‍. ഒരു താരതമ്യത്തിനല്ല, മൂലകവിതയുടെ കരുത്തും കാന്തിയും ഇതിനില്ല, അതിനു കാരണം- ഇതു എന്റെ, ’ഭൌമതാപങ്ങള്‍’ എന്ന കവിതയായതു തന്നെ.

ഭൌമതാപങ്ങള്‍

വേളിക്കു വേണം ’റിഹേഴ്സലെ’ന്നെന്‍
തോളത്തു തട്ടി നീ പണ്ടു ചൊല്ലി.

പടിവാതില്‍ പാളികള്‍ നീക്കിയുള്ളില്‍
ഇടംകാലു വച്ചു നീ കേറി നിന്നൂ
പതിയെ,പ്പുണര്‍,ന്നാകെ മൂടി,യെന്നെ
മതികെട്ടു ഞാനും മദിച്ചു തുള്ളി.

പുടവയായ് പൊന്‍വെയില്‍ തന്നെ നീട്ടി
മുടിയിലോ വെണ്മുകില്‍ പൂവു ചൂടി
ചരടൊരു തെന്നലിന്‍ നേര്‍ത്ത നാരാല്‍
തരിമണിച്ചേലൊത്തു ചേര്‍ത്തു കെട്ടി
ഒരു തരി സിന്ദൂര സാന്ധ്യ വര്‍ണ്ണ-
പ്പരല്‍ കൊണ്ടു സീമന്തരേഖ മൂടി.

കനവിന്റെ തേന്‍കനിയുണ്ടുറങ്ങാ-
നനുനയിച്ചെന്നെ നീ തൊട്ടുണര്‍ത്തി.
മിഴിയടച്ചിരുളിന്‍ വയലൊരുക്കി
ഉഴവുചാലില്‍ നുകച്ചൂടൊഴുക്കീ

അടരാടി കോശാണു രാഗവായ്പി-
ന്നടരുകളായിത്തുടിച്ചു നീന്തി.
വിയര്‍പ്പുപ്പിലുള്ളിന്‍ കടല്‍ത്തിളക്കം
ഉയിര്‍പ്പൂവിലുന്മദത്തേന്‍ വഴക്കം.

കനിവിയ,ന്നാത്മാനുതാപമോടെ
പനിമതിപ്പാലിന്‍ തണുപ്പു തൂവി
’ഇനി,യെന്നു നമ്മുടെ വേളി ?’-യെന്നെന്‍
കുനു ചില്ലി മെല്ലെ വളച്ചിടുമ്പോള്‍

തളരുന്നു; ഭൂമിതന്നുള്‍ക്കരുത്തില്‍
പുളയുന്ന പൌരുഷ സൂര്യതാപം
’എരിയു,മീ വേനലി’, ലെന്നു രാവിന്‍
തരിവെട്ടമായ് നീ പൊലിഞ്ഞിടുന്നൂ

വെയിലെത്ര മഴയെത്ര വന്നു പോയി
കുയിലുകള്‍ പാടിപ്പറന്നു പോയി
കയറും മലമുടിച്ചില്ലുടഞ്ഞൂ
വയലും വിഷക്കറപ്പേക്കളമായ്.

ഇവിടെയിത്താരാപഥത്തിരക്കില്‍
കവിയുന്ന ചോപ്പിന്‍ തെരുവരങ്ങില്‍
ഇടവേള തോറും ഞാന്‍ കാത്തിരിപ്പാ-
ണുടയോനെ, മൃത്യു റിഹേഴ്സലാടാന്‍.

നവബ്രാഹ്മണ്യം

2007-08-17T18:31:00.007+05:30

നാന്ദി

ബ്രാഹ്മണനാണു ഞാ,നെന്നെന്നു,മീ നവ-
ബ്രാഹ്മണ്യ,മെന്നെപ്പുലര്‍ത്തിടട്ടെ.

1

ഭൂമിയും പത്രവും ചാനലും പാര്‍ക്കുമായ്
സാമ്യവാദം പുതു ജന്മിയാകെ,
ഞാനു,മെന്‍ സമ്പാദ്യ,മിന്‍വെസ്റ്റു ചെയ്തിടാം
മോനൊരാള്‍ ഭാവിയില്‍ കേമനാകാന്‍.

പണ്ടത്തെ,പ്പാഴ്മരപ്പെട്ടിയില്‍ തപ്പിയാ-
ലുണ്ടാകു,മഞ്ചാറു പുസ്തകങ്ങള്‍
താളുകള്‍ പിന്നി, ച്ചിതല്‍, കൃമി, കീടങ്ങള്‍
വാളുമായാര്‍ക്കുന്ന തത്ത്വശാസ്ത്രം

ആര്‍ക്കാര്‍ക്കും വേണ്ടാതിന്നോര്‍ക്കുന്ന മാത്രയില്‍
കാര്‍ക്കിച്ചു തുപ്പും വിപര്യയങ്ങള്‍
നിങ്ങള്‍ക്കിരിക്കട്ടെ വര്‍ഗ്ഗാധിപത്യത്തിന്‍
ചങ്ങലപ്പൂട്ടുകള്‍ തീര്‍ത്തിടാനായ്

ചില്ലിട്ടു ശ്രീകോവില്‍ ഭിത്തിയില്‍ തൂക്കുകെന്‍
നല്ലൊരു ചിത്രം തിരി കൊളുത്തി,
രക്തപുഷ്പങ്ങളാലര്‍ച്ചന, കോടികള്‍
ഭക്തന്മാര്‍ കാണിയ്ക്ക,യേകിടട്ടെ

നൂറ്റെട്ടു നാമങ്ങള്‍ നിത്യം ജപിക്കണം
പറ്റിയാല്‍ ചോരക്കുരുതി വേണം

പാമരന്മാര്‍ക്കായി വ്യാഖ്യാനം; സാഹിത്യ-
ക്കോമരങ്ങള്‍ തുള്ളി,യാര്‍ത്തിടേണം

ലോകബാങ്കും മദ്യ, ലോട്ടറി, മാഫിയ-
ച്ചേകവര്‍ പൂരം നടത്തിടട്ടെ

കീഴാള രക്തത്തി,ലാറാട്ടു, പുണ്യാഹ-
മേഴെട്ടു നാള്‍ ’പഞ്ചതാര’ സദ്യ.

നന്ദി
ലോക,മിമ്മട്ടങ്ങു പോകട്ടെന്‍ താവഴി-
യ്ക്കേകട്ടെ, സ്ഥാന,മാനങ്ങളെന്നും.

ഓര്‍മ്മയിലൊരോണം

2007-08-15T23:15:00.000+05:30

ഓര്‍മ്മയിലൊരോണം

ഓണദിനങ്ങളായ് ദീപമെന്നും

കാണാണ,മാശ തെളിഞ്ഞു നിന്നൂ.

നമ്മള്‍ നടന്നൂ, നിറങ്ങളെ

കണ്ണു മുകര്‍ന്നൂ, ഇളം നീല

വര്‍ണ്ണം പകര്‍ന്നൂ, കനവിന്റെ

മന്ദിരം നിന്നൂ, വിചാരങ്ങ-

ളൊന്നായിരു ഹൃദയങ്ങള്‍

ചിന്നുന്നൊരു പൊന്നാഭയി-

ലെല്ലാമൊരേ നിറമെന്നു തോന്നി, തമ്മില്‍

തെല്ലുമേ ഭേദമില്ലെന്നു തോന്നി.

പിന്നെ നാം, ഭൂതം മറന്നു നീങ്ങി

കന്നിക്കിനാവും വിളഞ്ഞൊരുങ്ങി

പാതകള്‍ തിങ്ങീ, നിറഞ്ഞൊരു

തിക്കില്‍ കുരുങ്ങീ, വഴിയുടെ

ഓരത്തു തങ്ങീ, മയങ്ങീടും

ദീപത്തില്‍ മുങ്ങീ, പിരിയാതെ

കൈകോര്‍ത്തൊരു നേരം തിര-

പാകീ നവമോഹം പുതു

ലോകത്തില്‍ നമ്മളുയര്‍ന്നു പൊങ്ങി, പിന്നെ

ശോകങ്ങള്‍ നമ്മിലുറഞ്ഞുറങ്ങീ.

നാഗ ഗണം നാഡി തൊട്ടുലച്ചൂ

രാഗ,മനംഗനെ സല്ക്കരിച്ചൂ,

തിങ്കളുദിച്ചൂ, നിലാവിന്റെ

പൂക്കള്‍ പൊഴിച്ചൂ, നിഴല്‍ നമ്മെ

മാടി വിളിച്ചൂ, വസുധയും

കോരിത്തരിച്ചൂ, മൃദുസ്മേര-

പ്പുളകക്കുളിരുടലാകെയു-

മുലകാകെയു,മറിയാതെ

ചിക്കെന്നു നമ്മെയൊന്നുമ്മവച്ചു, പത്തു

ദിക്കിലും നാണ,മൊളിച്ചു വച്ചു.

പൂക്കള,മോര്‍മ്മയി,ലൂയലാടും

പൂക്കളില്‍ വാടി,യുണര്‍ന്നു പാടും

നമ്മളും നേടും, നിനവിലും

നിന്മനം തേടും, കനവിലെ

മോഹമാം മേടും, ചെറിയൊരു

കേമമാം വീടും, വികാരങ്ങ-

ളൊന്നായിടു,മന്നായിര-

മെരിയും നിറ ദീപങ്ങളു-

മാമോദമോടെ,യുലഞ്ഞു പാടും, നമ്മെ

പൂമാല കൊണ്ടവ,യാകെ മൂടും

സ്വാതന്ത്ര്യം - ഒരോര്‍മ്മ പുതുക്കല്‍

2007-08-15T00:19:00.000+05:30

1. ചരിത്രച്ചോരയില്‍ തിളങ്ങും വാക്കുകള്‍

’പഴിക്കരു,തിനി,
യിരുട്ടിനെ, നമ്മള്‍
പകരമാ,യൊരു
തിരി കൊളുത്തുക’

വെളിച്ചം
ദുഃഖമെന്നരുളുവോര്‍ക്കായി
വെളിച്ചത്തെയെന്നും
ഭയക്കുവോര്‍ക്കായി

ചരിത്രച്ചോരയില്‍
തിളങ്ങും വാക്കുകള്‍.

2. ഭഗത് സിംഗ്

ജീവിതത്തിന്‍ വസന്തകാലങ്ങള്‍, തന്‍
നാടിനായിട്ടുഴിഞ്ഞു വച്ചൂ സ്വയം.

എത്ര ഭീകര യാതന, വൈഷമ്യ,
മര്‍ദ്ദനങ്ങള്‍ സഹര്‍ഷം സഹിച്ചു നീ !

എന്തിനേറെ,യൊരു മുഗ്ദ്ധഹാസമോ-
ടങ്ങു ചുംബിച്ചു, മൃത്യുവെസ്സാദരം

എന്തിനു വേണ്ടിയായിരുന്നൊക്കെയു-
മെന്നു ശങ്കിപ്പതാരിദ്ധരിത്രിയില്‍ ?

അമ്മ ഭാരതഭൂമിതന്‍ മോചനം
തന്നെയല്ലി നീ കാംക്ഷിച്ചതെപ്പൊഴും !

3. നേതാജി

'തരിക രക്തം ഞാന്‍ തരാം പകരമാ-
യരിയ സ്വാതന്ത്ര്യം !’
അലയടിക്കുന്നു,ണ്ടെവിടെയും‍,
കാലം
കരിന്തിരി കത്തും പഴമനസ്സിലും‍
അരുമക്കുഞ്ഞിനെ-
യുറക്കു,മമ്മത,ന്നുറക്കു പാട്ടിലും
ഒരു കിളിക്കുഞ്ഞിന്‍
വിറയ്ക്കും ചുണ്ടിലും
സിരകളില്‍
ചുടു നിണമൊഴുകുമെന്‍
കരളിലും
ദിവ്യമുണര്‍ത്തുപാട്ടുപോല്‍.

ചരിത്രച്ചോരയില്‍
തിളങ്ങും വാക്കുകള്‍.

ജൈവസംബന്ധദാര്‍ഢ്യത്തിന്റെ വെളിപ്പെടലുകളാണ് കവിത -1

2007-08-14T23:35:00.000+05:30

"രാജലക്ഷ്മി" -എന്റെ കവിയാണ്, എന്ന് അവകാശപ്പെടുന്ന അനേകം ഭാവങ്ങള്‍ കവിതയിലൂടെ നമുക്കു സമ്മാനിച്ച ഒരു കവി വ്യക്തിത്വം, താന്‍ വളര്‍ന്നുകൊണ്ടിരിക്കുകയാണെന്ന് തന്നെത്തന്നെയും മറ്റുള്ളവരെയും ബോദ്ധ്യപ്പെടുത്തുന്ന സവിശേഷ സമയഘട്ടത്തെയാണ് ’കടല്‍ തിന്ന ജീവിതം’ എന്ന കവിത പ്രതിനിധീകരിക്കുന്നത്.

ബന്ധത്തിന്റെ തീക്ഷ്ണതകളില്‍ നിന്ന് ഒഴിഞ്ഞു നില്ക്കുന്നതാണ് കവിതയ്ക്കിഷ്ടം എന്ന സൈദ്ധാന്തിക തലത്തേക്കാള്‍ ബന്ധനങ്ങളില്ലാത്ത അതിതീക്ഷ്ണബന്ധങ്ങളാണ് - പലപ്പോഴും അവ ബന്ധങ്ങളായേക്കാം - കവിതയില്‍ തുടിച്ചു നില്ക്കുന്നത്, എന്നതാണല്ലൊ അനുഭവം. ബന്ധങ്ങള്‍ വലിച്ചു മുറുക്കിയ ഭാവതന്ത്രികളില്‍ ചെറു സ്പന്ദങ്ങള്‍ പോലും സുന്ദരമായ കാവ്യനാദങ്ങളായി തീരുന്നു. ’കടല്‍ തിന്ന ജീവിതം’ -അനുഭവമേഖലകളിലെ ജൈവസംബന്ധദാര്‍ഢ്യത്തിന്റെ നാദസൌന്ദര്യമാണ് വെളിവാക്കുന്നത്.

"ഇത്രമേലാതുരയാമെന്നെ-

യിത്തിരികൂടിയും ചേര്‍ത്തണയ്ക്കാതെയോ

നീലവൃത്തങ്ങളില്‍ തൃപ്തിയാത്ര"

ബന്ധിനിയെ പുറകിലുപേക്ഷിച്ച് തൃപ്തി തേടിയുള്ള തൃപ്തിയാത്ര. ’നീലവൃത്തങ്ങള്‍’ എന്ന പ്രയോഗത്തിലെ അര്‍ത്ഥവ്യാപ്തി അതിശയകരമായിരിക്കുന്നു. ’നീല’യ്ക്ക് നല്കാവുന്ന അര്‍ത്ഥാന്തരങ്ങള്‍ വിദിതം. അത് അനന്തതയുടെ മഹാവര്‍ണ്ണമാണ്. കാമത്തിന്റെ പച്ചയായ ആവിഷ്ക്കാരവുമാണ്. വൃത്തത്തിലുള്ള യാത്ര അനുസ്യൂതമായ ആവര്‍ത്തനവും. അര്‍ത്ഥശൂന്യത നിറഞ്ഞ ജീവിതരതിചക്രങ്ങളുടെ ബിംബ സന്നിവേശം കൊണ്ട് മാസ്മരികമായ ഒരു നാന്ദി കുറിച്ചിരിക്കുന്നു. ഈ ബിംബസന്നിവേശക്ഷമതയുടെ മാസ്മരികതയാണ് കാവ്യക്ഷേത്രത്തിലെ സിന്ദൂരവരപ്രസാദമായി രാജലക്ഷ്മിയെ സംക്രമിപ്പിക്കുന്നത്.

ഇഷ്ടപ്പെടലും പൊരുത്തപ്പെടലുകളും

തിരക്കൊഴിഞ്ഞ ബസ്സിനായുള്ള കാത്തു നില്പും; ഒടുവില്‍, തിരക്കേറിയതെങ്കിലും ഏതെങ്കിലുമൊന്നില്‍ കയറിക്കൂടി, ലക്ഷ്യത്തിലെത്തുവാനുള്ള തിക്കിത്തിരക്കും. ഇതിന്നിടയില്‍, വീണ്ടും നമുക്ക് നമ്മെ നഷ്ടപ്പെടുന്നു. ഏതെങ്കിലും ഒന്നില്‍ കയറിക്കൂടുന്നത്, ഒരുതരം വഴങ്ങിക്കൊടുക്കലാണ്. ഇഷ്ടപ്പെട്ടത് കിട്ടാതെ വരുമ്പോള്‍, കിട്ടിയതിനെ ഇഷ്ടപ്പെടുന്ന ഈ പൊരുത്തപ്പെടലില്‍, നാമെന്തായിരുന്നോ എന്താകാനാഗ്രഹിച്ചിരുന്നോ അതൊക്കെയും നമുക്ക് നഷ്ടപ്പെടുകയാണ്.

മുട്ടിയുരുമ്മുന്ന സഹയാത്രികരുടെ വീര്‍പ്പുമുട്ടലുകളും നിശ്വാസവും വിയര്‍പ്പുനാറ്റവും അസഹ്യമാകുമ്പോഴും; അവയ്ക്കിടയിലും ഇഷ്ടപ്പെടലിന്റേയും പൊരുത്തപ്പെടലിന്റേയും സാദ്ധ്യതകള്‍ ചികഞ്ഞെടുക്കപ്പെടുന്നു. സംഭാവ്യതകളുടെ ആവൃത്തി വിശകലനങ്ങളില്‍ മുഴുകി ഒഴിവാക്കാനാകാത്ത വേഗതയില്‍ ആറടി മണ്ണിലേക്കൊഴുകുന്നു. ’ശേഷം ചിന്ത്യം ശുഭം’ എന്ന് ജാതകങ്ങളിലെ സ്ഥിരം പല്ലവിയും. യാത്രയുടെ ഈ ദര്‍ശനഘടനയാണ് രാജലക്ഷ്മി - കവിതകളുടെ ചോദക സത്ത.

രാജലക്ഷ്മിയുടെ കാവ്യസപര്യയെ ആസ്വാദക പക്ഷത്തുനിന്ന് നിരീക്ഷിക്കുമ്പോള്‍ അനുഭവപ്പെടുന്ന കവി വളര്‍ച്ചയുടെ പ്രയാണനൈരന്തര്യം ചാരിതാര്‍ത്ഥ്യം ഉളവാക്കുന്നു. അത് ജനിപ്പിക്കുന്ന ആഹ്ലാദം കുറിക്കുവാന്‍ വിഷമമാണ്, നിസ്സീമമാണ്.

സ്വന്തം സ്ഥാനം

2007-08-14T22:13:00.000+05:30

സ്വന്തം സ്ഥാന,മിതെന്നു,മെന്നു,മിളകാ-

തിന്നെന്നപോല്‍ നില്ക്കുകില്‍

സ്വന്തം ബന്ധ,മിതൊക്കെ ദൂരെ,യെറിയാ-

നൊട്ടും മടിക്കാത്തവര്‍

ചന്തം പോരിനി താടി ധാടി,യിവയും

നന്നല്ല ചൊല്ലാ,മതും

കുന്തം ! പോയി മരിക്കുകീ,യുലകിലെ-

സ്സ്വാര്‍ത്ഥത്തിനെന്‍ ഭാവുകം.‍

ഇന്നത്തെ കവിത ഇങ്ങനെ...

2007-08-13T20:54:00.000+05:30

ഇന്നത്തെ കവിത ഇങ്ങനെ...
എന്തും കവിതയാണ്.
നാടകാന്തം കവിത്വമെന്ന് പഴമ.

ഇന്നത്തെ കവിത ഇങ്ങനെ...
കുറെ ആശയങ്ങള്‍
അടുക്കിവച്ചാല്‍
കവിതയാകുമോയെന്ന്
പുളിമരത്തിലിരിക്കുന്ന
കാക്കകള്‍ പോലും
ചോദിക്കുന്ന കാലം.

ഇന്നത്തെ കവിത ഇങ്ങനെ...
ഇഷ്ടികകള്‍
ക്രമമായി അടുക്കിയതല്ല,
കെട്ടിയ ഇടമാണ്
കെട്ടിടമെന്ന
കെട്ടുകഥ.

ഇന്നത്തെ കവിത ഇങ്ങനെ...
ചുമരില്‍ വരഞ്ഞതല്ല,
ചുമരില്ലാതെ വരഞ്ഞതാണ്
യഥാര്‍ത്ഥ ചിത്രമെന്ന്,
കാന്‍വാസില്‍ കാഷ്ടിച്ച കാക്ക,
അറിയാതെ തെറിച്ചു വീണ ചായം.

ചിത്രം,
ചുമരിനും ചായത്തിനുമിടയില്‍
ചിത്രകാരന്റെ ഓട്ടമെന്ന്, കവി.
ഇന്നത്തെ കവിത ഇങ്ങനെ...

13-08-2007

കിന്നാരം

2007-08-12T18:12:00.000+05:30

ഒരു കവിക്കൂട്ടിന്, സ്നേഹപൂര്‍വ്വം

എന്നെന്നു,മെന്നരികില്‍ - ഇരുന്നു നീ
കിന്നാരം ചൊല്ലിടേണം
എന്നുടെ,യാരാമത്തില്‍ - കൂടുകൂട്ടി
പുന്നാരപ്പൂങ്കിളിയേ

നാളുകളെണ്ണി,യെണ്ണി - എന്‍ കരളേ
നീ വരും നാളണയേ
ഓള,മിട്ടെന്റെ,യുള്ളില്‍ - ഉയരുന്ന
മേളങ്ങള്‍ കേള്‍ക്കു നീയും

സന്ധ്യവന്നീവഴിയില്‍ - കരളിലും
അന്ധത തിങ്ങിടുമ്പോള്‍
പൂര്‍ണ്ണേന്ദു നീയുദിച്ചെന്‍ - നഭസ്സിലും
പൌര്‍ണ്ണമി,പ്പാലൊഴുക്കൂ

യരലവ: മണ്ണിര

2007-08-12T10:36:00.000+05:30

കമന്റുകളെക്കുറിച്ച് ദേവന്‍ ഒരു പഠനം തന്നെ നടത്തിയിട്ടുണ്ട്.
പ്രായോഗികതലത്തില്‍ അതെത്രമാത്രം പ്രസക്തമായിരിക്കുന്നുവെന്നാണ് നാം ചിന്തിക്കേണ്ടത്.

ഒരു കഥാകൃത്ത്, കവി, സാഹിത്യകാരന്‍... എങ്ങനെയാണ് ആസ്വാദകപക്ഷത്തോട് പ്രതികരിക്കേണ്ടത് എന്നതിനൊരുദാഹരണമായി യരലവ-യെ ചൂണ്ടിക്കാണിക്കാം.

പെട്ടികള്‍, "മണ്ണിര" , "കോങ്കണ്ണി." എന്നിവയായിരുന്നു പ്രസിദ്ധീകരിച്ചവ. എന്നാല്‍ ആസ്വാദനത്തോട് ഭാവാത്മകമായി പ്രതികരിച്ചുകൊണ്ട് ’പെട്ടികള്‍’ അദ്ദേഹം എഡിറ്റു ചെയ്യാന്‍ തീരുമാനിച്ചു. രൂക്ഷമായ വിമര്‍ശനങ്ങളോ, കലപില ബഹളങ്ങളോ ഒന്നുമുണ്ടായിട്ടല്ല. വളരെക്കുറച്ചു കമന്റുകള്‍ മാത്രമെയുണ്ടായിരുന്നുള്ളുവെന്നാണ് തോന്നുന്നത്. ഒട്ടുമിക്കവാറും കാര്യമാത്രപ്രസക്തങ്ങളും.

ഒരു യഥാര്‍ത്ഥ കഥാകാരന് തന്റെ കഥയോടുണ്ടായിരിക്കേണ്ട അര്‍പ്പണ മനോഭാവമാണ് ഇവിടെ പ്രകടമാകുന്നത്. അര്‍പ്പണ മനോഭാവമുള്ളവര്‍ക്കേ വിജയമുണ്ടാകൂ..

യരലവ: മണ്ണിര

"വീണ്ടും പെറ്റ നാട്ടിന്റെ നാറ്റം;" നാടന്‍ പ്രയോഗമാണെങ്കിലും ’നാറ്റം’ സുഖമായി തോന്നിയില്ല.

കഥ മൂന്നും കൊള്ളാം, പെട്ടികള്‍ പൊട്ടിക്കാന്‍ പറ്റാഞ്ഞിട്ടാണോയെന്നറിയില്ല, സുഖിച്ചില്ല.

ഏവൂരാന്‍,- ’ജന്മഭൂമി’ എന്നതിന്റെ ’തനിമലയാളം’ ആണ് പെറ്റനാട്. ആദ്യം ഉപയോഗിച്ചത് യരലവ ആണോയെന്നറിയില്ല.

"മതി; മതി; എനിക്കു വയ്യ എനിക്കീ മണ്ണും മണ്ണിരയും മതി; വാഴത്തടത്തില്‍ വണ്ണമുള്ള മണ്ണിര കാണും."

അനുവാചകനും ഈ ആത്മസംതൃപ്തി അനുഭവിക്കുന്നു. ഇത് കഥാകാരന്റെ കഴിവാണ്.
യരലവ (type ചെയ്യാന്‍ പ്രയാസം)യുടെ ഈ കഴിവ് അനുദിനം വികസിക്കട്ടെയെന്നാശംസിക്കുന്നു.

രജി മാഷ്

8/11/2007 04:40:00 AM

യരലവ:-

രജി മാഷെ : “ പെറ്റ നാട്ടിന്റെ നാറ്റം” എന്നതു ഇന്‍ഡ്യില്‍ നിന്നു പുറത്തു പോയി നമ്മള്‍ തിരിച്ചിറങ്ങുമ്പോള്‍ നമുക്കു തോന്നിത്തുടങ്ങുന്ന ഒരു വിമ്മിഷ്ടത്തെ സൂചിപ്പിച്ചതാണ്, നമ്മള്‍ പുറത്തുപൊയി വന്നാല്‍ നട്ടിനോടു സ്നേഹം കൂടും, പുറത്തു കണ്ടതുപോലെയൊക്കെ എന്റെ നാട്ടിലും വേണം എന്നു തോന്നും. നമ്മുടെ പൊട്ടിപ്പോളിഞ്ഞ റോഡും ഗട്ടറും പാലങ്ങളും കച്ചറ കൂമ്പാരങ്ങളും പോസ്റ്ററുകളും കാണുമ്പോള്‍ ‘കയ്യും കാലും തളര്‍ന്നുപോവും‘. എന്റെ എത്രയോ തലമുറകല്‍ ജീവിക്കേണ്ട ജീവിച്ച എന്റെ മണ്ണ്, അതു നാറിയാലും പൂത്തുല്ലസിച്ചാലും എന്റേതു തന്നെ.

നാലു പെട്ടികള്‍ എന്നതു ഒരു വൈഡ് ആങ്കിളില്‍ എഴുതേണ്ട ഗള്‍ഫ് പ്രവാസിയുടെ നൊമ്പരമാണ്, അത് ഞാന്‍ ഡിലീറ്റുന്നു, അതു കഷ്ണിച്ചു കഷ്ണിച്ച് ഒരോരോ സംഭവമാക്കി എഴുതാം. അഭിപ്രായത്തിന് ഹൃദയം നിറഞ്ഞ നന്ദി.

8/11/2007 08:51:00 AM

Raji Chandrasekhar:-

”സുഖമായി തോന്നിയില്ല’ എന്നതിനു പകരം വിമ്മിഷ്ടം എന്നായിരുന്നു ചേര്‍ക്കേണ്ടീയിരുന്നത്, അല്ലെ. അപ്പൊ ആ വാക്കെനിക്കു കിട്ടിയില്ല.

പെട്ടികള്‍ delete ചെയ്യണമെന്നു ഞാന്‍ ഉദ്ദേശിച്ചിരുന്നില്ല, എങ്കിലും അങ്ങനെ ചെയ്യാനുള്ള താങ്കളുടെ തീരുമാനം ഉചിതമായി. അതില്‍ നിന്നു പല നല്ല കഥകളും പിറക്കും. സംശയമില്ല. കാത്തിരിക്കുന്നു.

ബ്ലോഗ് settings ല്‍ emil- blogsendaddress ല്‍ rahasyalokam@googlegroups.com എന്നു കൊടുത്താല്‍ താങ്കളുടെ പുതിയ പോസ്റ്റുകള്‍ എനിക്കും ഗ്രൂപ്പിലെ മറ്റുള്ളവര്‍ക്കും ചൂടോടെ കിട്ടുമായിരുന്നു. മാറ്റം വരുത്തുമല്ലൊ.

പിന്നെ, അനുവാചകന്റെ ഭാവനയ്ക്കു കത്തിപ്പടരാന്‍ കുറെക്കൂടി സൂചനകള്‍ കൊടുക്കുന്നതിനെക്കുറിച്ചും ആലോചിക്കണേ..

താങ്കളുടെ പോസ്റ്റും എന്റെ കമന്റുകളും മറുപടിയും രഹസ്യലോകത്തില്‍ ബ്ലോഗുവായന, കമന്റുകള്‍ എന്നീ വിഭാഗങ്ങളായി കൊടുക്കുന്നു, അനുവദിക്കുമെന്ന പ്രതീക്ഷയോടെ.
8/11/2007 10:38:00 PM

കമന്റുകള്‍ ഓര്‍ത്തിരിക്കാന്‍

2007-08-12T10:08:00.000+05:30

മറ്റു ബ്ലോഗുകളില്‍ ഇടുന്ന കമന്റുകള്‍ എങ്ങനെ track ചെയ്യാം എന്നു ചോദിച്ചിട്ട് ഒന്നും പറഞ്ഞില്ലല്ലൊ. cocomments ഒരു ബട്ടണ്‍ drag & drop 0n to the bookmark എന്നോ മറ്റോ കണ്ടു. drag & drop ചെയ്യാന്‍ പറ്റുന്നില്ല. del.icio.us ലും അതു തന്നെയാണ് സ്ഥിതി.
തത്ക്കാലം ഓര്‍മ്മ വന്ന കമന്റുകള്‍ ഇവിടെത്തന്നെ സൂക്ഷിക്കട്ടെ.
നല്ലൊരു മാര്‍ഗ്ഗം പറഞ്ഞു തരണേ...

എന്റെ നാലുകെട്ടും തോണിയും: വേലി

വേലി-കവിത-നന്നയി.

കാറ്റു വീശുന്നിടത്തൊക്കെ വേലി കെട്ടണ്ട കാര്യമില്ല.

കാറ്റു കൊള്ളാന്‍ ആര്‍ക്കാ ആഗ്രഹമില്ലാത്തത്.

കാറ്റ് കൊടുങ്കാറ്റാകാതെയും അഴുക്കുചാലില്‍ നിന്നാകാതെയും സൂക്ഷിക്കാനായാല്‍ നന്ന്.

പക്ഷെ, ഇളം കാറ്റിനെതിരെയുള്ള വേലികളെല്ലാം കൊടുങ്കാറ്റില്‍ തകരുന്നതായും കാണാറുണ്ട്.

ഒന്നു രണ്ടു വരികള്‍ കാവ്യഭംഗിക്കു മങ്ങലേല്പിച്ച പോലെ തോന്നി.

"രണ്ട് മാംസത്തുണ്ടുകളടുക്കി വെയ്ക്കുമ്പോള്‍
‍അവയില്‍ രക്തം പൊടിഞ്ഞിരിക്കണം"

"ചോരവാര്‍‍ന്നൊരു മാറിടവും തുടകളും
കാത്തുമവന്‍ ഇനിയുമിരിക്കും"

മാംസത്തുണ്ട്, രക്തം, ചോര, മാറിടം, തുടകള്‍ എന്നീ വാക്കുകള്‍ ഉപയോഗിക്കാതെ തന്നെ താങ്കള്‍ക്ക് ഈ കവിത ഭംഗിയാക്കാനുള്ള കഴിവുണ്ടായിരുന്നല്ലൊ.

Thursday, August 09, 2007 12:58:00 PM

ലാപുട: വഴുക്ക്

2007-08-11T18:13:00.000+05:30

ലാപുട: വഴുക്ക്

മഞ്ഞുമലയുടെ അടരുകള്‍ പരസ്പരം നോവിക്കാതെ വഴുതി നീങ്ങുന്നതുപോലെ, ഒരു കവിതയിലൂടെ, കാവ്യാനുഭവത്തിലൂടെ കടന്നു പോകുവാന്‍ ഇന്നവസരം കിട്ടി. ’ലാപുട’ എനിക്കൊരു വായനാ വിസ്മയമായിരുന്നു.

നിമീലിതനേത്രങ്ങള്‍ക്കുള്ളീല്‍ സ്വപ്നങ്ങളില്‍ നിന്നു സ്വപ്നങ്ങളിലേക്കു വഴുതി നീങ്ങുന്ന കണ്മണിയെ നിര്‍ന്നിമേഷനായി നോക്കിയിരിക്കുമ്പോള്‍ ഓരോരോ വഴുക്കലിനുമിടയില്‍ കവിതകള്‍ പിറവിയെടുത്തുകൊണ്ടേയിരിക്കുന്നു. അവയാണ് ജീവിതാനുഭവങ്ങളിലൂടെ വഴുതിയൊഴുകി പലതരത്തിലുള്ള കാവ്യപ്രവാഹങ്ങളായിത്തീരുന്നത്. സര്‍ഗ്ഗധനനായ ഓരോ കവിയും ഓരോ കാവ്യപ്രവാഹമാണ്. അങ്ങനെയൊരു പ്രവാഹമായി ലാപുട നമ്മുടെയുള്ളിലേക്കൊഴുകിയെത്തുമ്പോള്‍ അതിലാറാടി രസിക്കാനല്ലാതെ കരയിലിരുന്ന് കല്ലെടുത്തെറിയാന്‍ ഏതു സഹൃദയനാണ് കഴിയുക !

"കാഴ്ചയുടെ വരമ്പില്‍ നിന്ന്
നമ്മുടേതല്ലാത്ത
വയലുകളിലേക്ക് വഴുക്കുന്ന"-താണ് ജീവിതം. ഈ തിരിച്ചറിവിന്റെ തുരീയാവസ്ഥയില്‍ " ജീവിതം സമയത്തിനുമേലെ വഴുവഴുക്കു"-കയുമാണ്.

സൃഷ്ടിയിലേക്കു നയിക്കുന്ന ആനന്ദത്തിന്റെ വഴുവഴുപ്പില്‍ തുടങ്ങി പിറവിയും പുനസൃഷ്ടിയും കടന്ന്
അഗ്നിയിലുരുകുന്ന നെയ്യിന്റെ വഴുവഴുപ്പിലവസാനിക്കുന്നതിന്നിടയിലാണ്
"സംഭവിക്കുന്നതെന്തെന്ന്
അറിയാനിടതരാതെ
കാര്യങ്ങള്‍
ഒന്നില്‍നിന്നൊന്നിലേക്ക്
തെന്നിവീണുകൊണ്ടിരിക്കുന്ന"-ത്.

ലാപുട നമ്മളെ അനുഭവിപ്പിക്കുന്നതും അതുതന്നെയാണ്.

അന്ന്

2007-08-10T21:42:00.000+05:30

വഴിവക്കിലന്നൊന്നു കണ്ടപ്പോളെന്തിനാ-
ണഴിയാക്കുരുക്കിട്ടു നിന്റെ മൌനം
ഒരു മാത്ര നില്ക്കാതെ,യൊരു വാക്കു മിണ്ടാതെ
ഒരു മിന്നല്‍ പോലെ നീ പോയതെന്തേ

പടിവാതില്‍ മെല്ലെത്തുറക്കാതെ, മുകിലുകള്‍
ഇടിവെട്ടിപ്പേമാരി പെയ്തിടാതെ
ഇമകളില്‍ കാവ്യം വ്ടര്‍ത്താതെ, വിരലുകള്‍
വിറയാര്‍ന്നു ചേര്‍ത്തിടാതെന്‍ കിനാവില്‍

ചിരി തൂകും പുലരിയി,ലഴല്‍ തിങ്ങു,മോര്‍മ്മകള്‍
വിരിവയ്ക്കും മൌനം കറുത്തിടുമ്പോള്‍
കരുണതന്നാര്‍ദ്രകണങ്ങളും തേടിയെന്‍
കുരുവികള്‍ പുല്‍മേട്ടില്‍ വീണിടുമ്പോള്‍

മുഖവും തിരിച്ചു നീ മൌനത്തിലാഴുന്നു
നഖ,മെന്റെ കരളിലേയ്ക്കാഴ്ത്തിടുന്നൂ
നിണരാഗം പടരുന്നു ചക്രവാളങ്ങളില്‍
കണയേറ്റു വീഴുന്നു മൌനമന്ത്രം

ശരി ശരി നിന്നെ വിളിച്ചു ഞാന്‍, പക്ഷെ

2007-08-10T18:27:00.000+05:30

ശരി ശരി നിന്നെ വിളിച്ചു ഞാന്‍, പക്ഷെ
പറഞ്ഞില്ല,യെന്നില്‍ നിറയുവാന്‍

സിരകളിലാളിപ്പടരുവാ,നെന്റെ
കരളിലഗ്നിയായ് ജ്വലിക്കുവാന്‍

കരിയിലപോലെ വിയത്തിനപ്പുറം
തരളമേഘമായ് പറത്തുവാന്‍

ചതി നിറയുമെന്‍ വികാരവേഗത്തിന്‍
കതിരുകള്‍ തല്ലിക്കൊഴിക്കുവാന്‍

നിനവുകള്‍ ഞെട്ടും ചെറു ചോദ്യങ്ങളാല്‍
കനവിലും ശാന്തി കെടുത്തുവാന്‍

തസ്ലീമ നസ്റീന്‍ ആക്രമിക്കപ്പെട്ടു- ഹൈദരാബാദില്‍

2007-08-09T21:24:00.000+05:30

തസ്ലീമ നസ്റീന്‍ ആക്രമിക്കപ്പെട്ടു.

ഹൈദരാബാദില്‍

എം. എല്‍. എ. മാരാണ് ആക്രമിച്ചത്.

അഭിപ്രായ സ്വാതന്ത്ര്യം ഹനിക്കപ്പെടുന്നുവോ...?

അക്രമത്തിലേര്‍പ്പെട്ടവരെ നിയമസഭയില്‍ നിന്ന് പുറത്താക്കേണ്ടതുണ്ടോ....?

സാരംഗിയുടെ കവിത-മൌനമാണിന്നു ഞാന്‍

2007-08-09T20:16:00.001+05:30

mog.com

More about this song

സാരംഗി, കവിത ചൊല്ലുമ്പോള്‍.......

മരണച്ചിലമ്പിന്‍ കിലുക്കമല്ല

ചിറകറ്റ സ്വപ്നച്ചിതകളല്ല,

പൂനിലാത്തൂവല്‍ തൊടുന്നപോലെ

പ്രേമാര്‍ദ്ര,മോമലിന്‍ കൊഞ്ചല്‍ പോലെ

ഒരു കുഞ്ഞു പുഞ്ചിരിച്ചേലു പോലെ

തിരുവോണ നാളിന്‍ കിനാവു പോലെ

ബ്ലോഗുവായന

2007-08-08T17:26:00.000+05:30

വായനയുടെ വിശാലമായ വാതായനങ്ങളാണ് ബ്ലോഗുകള്‍ തുറന്നു തന്നത്. ഇത്രയധികം സര്‍ഗ്ഗാത്മകതയുള്ള ജനതതി ഏതൊരു രാജ്യത്തിനും മുതല്ക്കൂട്ടു തന്നെയാണ്.

ബ്ലോഗുകളെ പലവിഭാഗങ്ങളായി തരം തിരിച്ചിരിക്കുന്നതു പരിശോധിച്ചാല്‍ തന്നെ ഈ മേഖലയുടെ വ്യാപ്തി മനസ്സിലാക്കാവുന്നതേയുള്ളു. എല്ലാ വിഭാഗത്തിലും പെട്ട ബ്ലോഗുകളെ പരിശോധിക്കുവനും വിലയിരുത്തുവാനും തുടങ്ങിയാല്‍ എവിടെച്ചെന്നവസാനിക്കും ദിനംപ്രതി പുതിയ പുതിയ പോസ്റ്റുകളും ബ്ലോഗുകളും വന്നുകൊണ്ടേയിരിക്കുന്നു. പലതും ഒന്നോ രണ്ടോ പോസ്റ്റുകളോടെ അവസാനിക്കുകയും ചെയ്യുന്നു.

ഈ സാഹചര്യത്തില്‍ വായനയ്ക്കായി ബ്ലോഗുകളെ എങ്ങനെ തെരഞ്ഞെടുക്കുമെന്നത് ഇപ്പോഴും ഒരു സമസ്യയാണ്.

മലയാളം ബ്ലോഗര്‍മാരായി എന്റെ മുന്‍പേ നടന്നു നീങ്ങിയവര്‍ എന്റെ കൈപിടിച്ച് അവരോടൊപ്പം കൂട്ടിയത് ഏറെ അനുഗ്രഹമായി.

പരിമിതികള്‍ക്കുള്ളില്‍ നിന്നുകൊണ്ട് പരമാവധി വിശാലമായ മനോഭാവത്തോടെ ബ്ലോഗ് വായനതുടരട്ടെ. ’ബ്ലോഗുവായന’യില്‍ പല പോസ്റ്റുകളുടേയും ഭാഗങ്ങള്‍ ഉള്‍പ്പെടുത്തേണ്ടി വന്നേക്കും. അതിനുള്ള അനുമതിയും അനുഗ്രഹവും നല്കണേ.....

രഹസ്യലോകം

മത്സരപ്പരീക്ഷാര്‍ത്ഥികള്‍ ശ്രദ്ധിക്കുവാന്‍.....

Astroraji 9995361657

നവംബര്‍ 5

സഖീ,,,,,,,

ഉറങ്ങാത്തവര്‍ക്കു്.....

നിന്നെയും തേടി...

PROTEST MARCH AGAINST THE RECOMMENDATIONS OF THE 9th PAY REVISION COMMISSION CONDUCTED BY GSTU ATTINGAL

ശ്രീ മുഹമ്മദ് റാഫി സാറില്‍ നിന്ന് ......

[[എന്‍ഡോസള്‍ഫാന്‍]]

പരമേശ്വര്‍ജിയുമായുള്ള ഇന്‍റര്‍വ്യൂ

സൂര്യകലഹം

വിഭ്രമം

സ്ക്വിഡൂ...

നീലക്കുരുവി..

രാഗസര്‍പ്പങ്ങള്‍...

അംഗീകാരം

അക വിത

ദീക്ഷിതന്‍

കറുപ്പ്

ഹൃദയത്തില്‍ നിന്ന്

ബാലകവിതകള്‍

കാരണവരുടെ ചിരി

കാര്‍ട്ടൂണ്‍ കവിതകള്‍

അ ക്ഷമ

ആരും കണ്ടില്ല..........!

ആര്‍ക്കാണ് ബോധം.....?

കാരണവര്‍

...........................???

ജനിതക വൈക്ലബ്യം

നാലോ അഞ്ചോ കോടികള്‍

പ്രണയവാത്സല്യം

ഒരു

ദിവസമാണെങ്കിലും

കാണാതിരിക്കാന്‍

പ്രയാസമാണല്ലൊ

കുഞ്ഞെ….

ഇതു പ്രണയമല്ലല്ലൊ….?

ബന്ധനങ്ങളുടെ

നനുനനുത്ത

നൂലിഴകളില്‍

തലങ്ങും വിലങ്ങും

വരിഞ്ഞു മുറുകുമ്പോള്‍

ഇനിയെന്തു പ്രണയം……

നീ

പ്രണയത്തില്‍ നിന്ന്

വാത്സല്യത്തിലേയ്ക്കെന്നെ

വലിച്ചെടുക്കുമ്പോള്‍

ഉണ്മയുടെ

അമൃതകുംഭങ്ങള്‍ നിറയുന്നു.

നീ

ചിരിനിലാവ്….

എന്നാലും

കാണാതിരിക്കാന്‍

വയ്യ…….

26-02-2009

സിനിമയിലെ വില്ലന്മാര്‍

സിനിമയിലെ വില്ലന്മാര്‍

ഇപ്പോള്‍

ബലാത്സംഗം ചെയ്യാറില്ല.

വലിച്ചു കീറാനോ

ഉരിഞ്ഞെറിയാനോ

ഉടുതുണികളില്ലാഞ്ഞിട്ടല്ല.

പ്രായം കൂടിയതുകൊണ്ടോ

ആവതില്ലാത്തതുകൊണ്ടോ

അല്ല.

ചെറുപ്പക്കാരായ

ചെറുമക്കളെ

പരിശീലിപ്പിക്കുകയാണ്.

അവര്‍ക്കാണ്

അത്തരം ജോലികള്‍…

അല്ലെങ്കിലും

അതിപ്പൊ

അങ്ങനെയൊക്കെത്തന്നെയാണല്ലൊ

ജീവിതത്തിലും…….

വില്ലന്മാര്‍

വയസ്സായി

മന്ത്രിമാരാകുമ്പോള്‍

അവരുടെ മക്കള്‍…

മന്ത്രിപുത്രന്മാര്‍….